Qazaqstan men Qyrǵyzstan fıtosanıtarııalyq qaýipsizdik boıynsha memorandýmǵa qol qoıdy
ASTANA. KAZINFORM- Almatyda ótken «Aýyl sharýashylyǵyndaǵy transshekaralyq zııandy organızmderdi basqarý salasyndaǵy óńirlik yntymaqtastyq — Transboundary Plant Health Dialogue 2026» halyqaralyq semınary aıasynda Qazaqstan men Qyrǵyzstannyń beıindi uıymdary arasynda ózara yntymaqtastyq týraly memorandýmǵa qol qoıyldy.
QR Aýyl sharýashylyǵy mınıstrligi baspasóz qyzmetiniń habarlaýynsha, halyqaralyq semınarǵa Qazaqstan, Qytaı, Qyrǵyzstan jáne Ózbekstannyń memlekettik organdarynyń, ǵylymı jáne bilim berý uıymdarynyń, beıindi mekemeleriniń, sondaı-aq halyqaralyq seriktesterdiń ókilderi qatysty.
Qatysýshylar transshekaralyq fıtosanıtarııalyq qaterlerdiń aldyn alý jáne olardy baqylaý máselelerin talqylady. Onyń ishinde karantındik jáne asa qaýipti zııandy organızmderdiń, ósimdik aýrýlary men aramshópterdiń taralýyna jol bermeý sharalary qaraldy.
Mundaı qaterlerdi tıimdi basqarý elderdiń is-qımyldaryn úılestirýdi, aqparatpen jedel almasýdy, birlesken monıtorıng júrgizýdi, dıagnostıka júıesin jetildirýdi jáne erte eskertý tetikterin damytýdy talap etetini atap ótildi.
Ósimdikterdi qorǵaý salasynda zamanaýı tehnologııalardy qoldanýǵa erekshe nazar aýdaryldy.
Atap aıtqanda, fıtosanıtarııalyq qaterlerdi anyqtaý jáne monıtorıngteý úshin Jerdi qashyqtan zondtaý, Big Earth Data, spýtnıktik monıtorıng, ushqyshsyz ushý apparattary, zattar ınterneti datchıkteri jáne jasandy ıntellekt múmkindikterin paıdalaný máseleleri qaraldy.
Semınardyń negizgi praktıkalyq nátıjeleriniń biri — Qazaqstan men Qyrǵyzstannyń beıindi uıymdary arasynda ózara yntymaqtastyq týraly memorandýmǵa qol qoıylýy boldy.
Qujatqa Ulttyq agrarlyq ǵylymı-bilim berý ortalyǵy, Qyrǵyz Respýblıkasynyń Sý resýrstary, aýyl sharýashylyǵy jáne qaıta óńdeý ónerkásibi mınıstrligi janyndaǵy Qaıta óńdeý ónerkásibi jáne organıkalyq aýyl sharýashylyǵy departamenti, Jazken Jıembaev atyndaǵy Qazaq ósimdikterdi qorǵaý jáne karantın ǵylymı-zertteý ınstıtýty jáne «Qyrǵyzstannyń orman jáne jer paıdalanýshylar qaýymdastyǵy» zańdy tulǵalar birlestigi qol qoıdy.
Memorandým ǵylymı zertteýler, fıtosanıtarııalyq táýekelderdi monıtorıngteý, aqparat pen tehnologııalar almasý, mamandar daıarlaý, sondaı-aq birlesken jobalardy ázirleý jáne iske asyrý baǵyttaryndaǵy yntymaqtastyqty kózdeıdi.
Qol jetkizilgen ýaǵdalastyqtardy iske asyrý eki eldiń beıindi uıymdary arasyndaǵy ózara is-qımyldy nyǵaıtýǵa, transshekaralyq fıtosanıtarııalyq qaterlerdi anyqtaý jáne olardyń aldyn alý tıimdiligin arttyrýǵa, sondaı-aq ósimdikterdi qorǵaýdyń zamanaýı ádisterin keńinen qoldanýǵa múmkindik beredi.
Semınardyń ótkizilýi jáne memorandýmǵa qol qoıylýy fıtosanıtarııalyq jáne azyq-túlik qaýipsizdigi salasyndaǵy óńirlik yntymaqtastyqty damytý jolyndaǵy mańyzdy praktıkalyq qadam boldy.
Osyǵan deıin Qazaqstan, Ózbekstan jáne Qyrǵyzstannyń fıtosanıtarııalyq qyzmetteri kúsh biriktiretini týraly jazdyq.
