Qazaqstan men Qyrǵyzstan bir-birine Elshilikteri úshin jer ýchaskelerin óteýsiz beredi
ASTANA. KAZINFORM – Búgin Májilistiń jalpy otyrysynda depýtattar Qazaqstan men Qyrǵyzstan arasyndaǵy Elshilikter úshin jer ýchaskelerin óteýsiz berýdi kózdeıtin kelisimdi ratıfıkatsııalady.
– «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy eki el Elshilikteriniń, sondaı-aq Elshileriniń rezıdentsııalarynyń muqtajdyqtary úshin Astana men Bishkek qalasyndaǵy ǵımarattardy jáne jer ýchaskelerin ózara óteýsiz paıdalanýǵa berý týraly kelisimdi ratıfıkatsııalaý týraly» zań jobasy usynylyp otyr. Kelisimge 2025 jylǵy 22 tamyzda Bishkekte Qazaqstan Prezıdenti Qasym-Jomart Toqaevtyń Qyrǵyz Respýblıkasyna jasaǵan sapary aıasynda qol qoıyldy. Kelisimniń negizgi maqsaty – dıplomatııalyq ókildikterdiń jumys isteýi úshin tıisti jaǵdaılardy qamtamasyz etý. Qujat astana men Bishkek qalalarynda ǵımarattar men jer ýchaskelerin 49 jyl merzimge uzartý quqyǵymen óteýsiz paıdalanýǵa ózara berýdi retteıdi, - dedi qujat boıynsha negizgi baıandama jasaǵan Syrtqy ister mınıstriniń orynbasary Álibek Qýantyrov.
Onyń dereginshe, Qazaqstannyń Qyrǵyzstandaǵy Elshiligine aýdany 0,75 gektar jer telimi, al Qazaqstan Elshisi rezıdentsııasy úshin 0,17 gektar jer telimi bólindi. Al Qyrǵyzstannyń Qazaqstandaǵy Elshiligine aýdany 0,74 gektar jer telimi, Elshi rezıdentsııasy úshin 0,125 gektar jer telimi beriledi.
– Osyǵan baılanysty zań jobasy bólingen ǵımarattar men jer ýchaskelerin quqyqtyq retteýdi kózdeıdi. Osy kelimimdi ratıfıkatsııalaý taraptardyń múddelerine saı keledi. Qazaqstan men Qyrǵyzstan arasyndaǵy saıası dıalog pen ózara senimdi, sonymen qatar ózar is-qımyldy damytý úshin berik negiz bolady, - dedi Álibek Qýantyrov.
Aıta keteıik, búgin Májilistiń jalpy otyrysynda QR Úkimetiniń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esebi talqylandy.
