Qazaqstan men Qyrǵyzstan avıatsııalyq qutqarý jumystarynda yntymaqtastyqty nyǵaıtady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy avıatsııalyq izdestirý jáne qutqarý salasyndaǵy yntymaqtastyq týraly kelisimdi ratıfıkatsııalaý týraly» Zańy qabyldady.
Zań jobasy 2022 jylǵy 26 mamyrda Bıshkek qalasynda jasalǵan eki el úkimetteri arasyndaǵy avıatsııalyq izdestirý jáne qutqarý salasyndaǵy yntymaqtastyq týraly kelisimdi ratıfıkatsııalaýǵa baǵyttalǵan.
Kelisimniń maqsaty — Halyqaralyq azamattyq avıatsııa uıymynyń (IKAO) standarttaryna sáıkes, apattyq jaǵdaıdaǵy nemese apatqa ushyraǵan áýe kemeleriniń jolaýshylary men ekıpajdaryn izdestirý jáne qutqarý úshin memleketterdiń izdestirý-qutqarý qyzmetteri arasyndaǵy yntymaqtastyqty nyǵaıtý.
Osy Kelisim memleketterdiń áýe kemelerin izdestirý jáne qutqarý salasyndaǵy is-qımyldaryn úılestirýge yqpal etedi.
Sondaı-aq kelisimniń maqsattaryna mynalar kiredi:
— avıatsııalyq oqıǵalar týraly ózara habarlaý jáne apattyq jaǵdaıdaǵy nemese apatqa ushyraǵan áýe kemeleriniń jolaýshylary men ekıpajdaryn izdestirý jáne qutqarý boıynsha barlyq qajet sharany dereý qabyldaý;
— eki jaqtyń izdestirý-qutqarý qyzmetteriniń birlesken oqý-jattyǵýlaryn ótkizý, aqparat pen tájirıbe almasý;
— izdestirý-qutqarý jumystaryn júrgizý kezinde, onyń ishinde transshekaralyq aýmaqta taraptardyń biriniń ótinishi boıynsha ózara kómek kórsetý (avıatsııalyq jáne jerústi izdestirý-qutqarý kúshterimen qamtamasyz etý).
