Qazaqstan men Qyrǵyzstan arasyndaǵy ınvestıtsııa qanshalyqty ósti
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy ınvestıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» Zańy qabyldandy.
Qazaqstan men Qyrǵyzstan arasyndaǵy kelisimge 2024 jylǵy 19 sáýirde Astanada qol qoıyldy. Kelisimniń maqsaty — ınvestıtsııalyq qyzmet úshin qolaıly jaǵdaı jasaý, tikeleı sheteldik ınvestıtsııalar aǵynyn yntalandyrý jáne ýaǵdalasýshy elderdiń ekonomıkalyq ál-aýqatyn jaqsartý.
— Kelisimniń jańa nusqasyn qyrǵyz jaǵy 2021 jyly Qyrǵyzstannyń atqarýshy bıligi qurylymyndaǵy ózgeristerge baılanysty usynǵan bolatyn. 1997 jyly jasalǵan burynǵy kelisim shamamen 30 jyldan keıin halyqaralyq jáne ulttyq zańnamadaǵy ózgeristerdi eskere otyryp, jańartýdy qajet etti. Qazirgi zamanǵy bolmys mundaı qujattardy ınvestorlardy qorǵaý jáne qolaıly ınvestıtsııalyq klımat qurý talaptaryna jaqsyraq jaýap beretindeı etip qaıta qaraýdy talap etedi. Investıtsııalardy kótermeleý jáne qorǵaý týraly kelisimder ınvestıtsııalardyń senimdiliginiń mańyzdy kórsetkishi sanalady, — dedi QR Syrtqy ister mınıstriniń orynbasary Álibek Qýantyrov.
Onyń aıtýynsha, ekijaqty ınvestıtsııalyq kelisim ınvestorlarǵa quqyqtyq kepildikter berip, tıisti jaǵdaıdy qamtamasyz etedi. Bul rette, halyqaralyq arbıtrajǵa qol jetkizý, sheteldik ınvestıtsııalarǵa ádil qaraý sııaqty mańyzdy tetikterdi bekitedi.
— Jalpy, Qazaqstan men Qyrǵyzstan arasyndaǵy saýda-ekonomıkalyq jáne ınvestıtsııalar salasyndaǵy ekijaqty yntymaqtastyqtyń ósý úrdisi baıqalyp otyr. Qazaqstan Qyrǵyzstannyń úshinshi iri saýda seriktesi sanalady. Eki el arasyndaǵy taýar aınalymy 2024 jyly 1,7 mlrd AQSh dollaryn qurady, bul osyǵan deıingi jyldyń sáıkes kezeńimen salystyrǵanda 1,5 paıyzǵa joǵary. Qazaqstannan eksport 9,6 paıyzǵa ósip, 1,3 mlrd AQSh dollaryna jetti. Bul bizdiń ekonomıkalyq qarym-qatynasymyzdyń turaqtylyǵyn baıqatyp otyr. Qazaqstan Ulttyq bankiniń derekterine sáıkes, 2024 jyldyń 9 aıynda Qyrǵyzstannan 4,8 mln dollar quraıtyn tikeleı sheteldik ınvestıtsııa tartyldy. Bul kórsetkish 2023 jyldyń 9 aıymen salystyrǵan 18 paıyzǵa joǵary. Qazaqstan ınvestorlarynan atalǵan kórshi elge tikeleı ınvestıtsııalardyń jalpy aǵyny 2024 jyldyń 9 aıynda 48 mln dollardy qurady, bul onyń aldyndaǵy kórsetkishten 4,8 paıyzǵa joǵary, — dedi mınıstrdiń orynbasary.
Onyń sózine qaraǵanda, kelisimdi iske asyrý teris áleýmettik-ekonomıkalyq saldarǵa ákep soqpaıdy jáne respýblıkalyq qosymsha shyǵystardy talap etpeıdi.
Budan buryn habarlanǵandaı, Qyrǵyzstan Ortalyq Azııa elderine vızasyz rejım engizýdi usyndy.