Qazaqstan men Qyrǵyzstan arasyndaǵy AÓK ónimderiniń taýar aınalymy 41,5%-ǵa ósti

Almatyda ótken Eýrazııalyq ekonomıkalyq odaqtyń agroónerkásiptik saıasat jónindegi keńesiniń 7-otyrysy aıasynda aýyl sharýashylyǵy mınıstri Aıdarbek Saparov Qyrǵyz Respýblıkasynyń Mınıstrler Kabıneti Tóraǵasynyń orynbasary — sý resýrstary, aýyl sharýashylyǵy jáne qaıta óńdeý ónerkásibi mınıstri Erlıst Akýnbekovpen kezdesti.

Kezdesý barysynda mınıstrler agroónerkásiptik keshendegi yntymaqtastyqty odan ári damytý, aýyl sharýashylyǵy ónimderiniń ózara saýda kólemin ulǵaıtý, óndiristik kooperatsııany damytý jáne birlesken jobalardy iske asyrý máselelerin talqylady.

2025 jyldyń qorytyndysy boıynsha Qazaqstan men Qyrǵyzstan arasyndaǵy AÓK ónimderiniń taýar aınalymy 511,3 mln AQSh dollaryn qurap, ótken jylmen salystyrǵanda 41,5%-ǵa ósti. Qazaqstannan aýyl sharýashylyǵy ónimderiniń eksporty 418,9 mln AQSh dollaryna jetti.

2024 jylmen salystyrǵanda dándi daqyldar jetkizilimi 4 eseden astam, al maıly daqyldar 1,5 esege ósti.

Qazaqstan dándi jáne maıly daqyldardy qaıta óńdeý ónimderin, kúnjarany, kúnbaǵys maıyn, qus etin jáne suranysqa ıe basqa da ónimderdi eksporttaý kólemin ulǵaıtýǵa daıyn.

— Ózara saýdada turaqty oń dınamıkany kórip otyrmyz jáne onyń kólemin odan ári arttyrýǵa, jetkiziletin ónim túrlerin keńeıtýge, sondaı-aq elderimiz arasyndaǵy kooperatsııalyq baılanystardy nyǵaıtýǵa múddelimiz, — dedi Aıdarbek Saparov.

Taraptar beıindi vedomstvolar buǵan deıin qol qoıǵan 2026–2027 jyldarǵa arnalǵan aýyl sharýashylyǵy ónimderin ózara jetkizýdi ulǵaıtý jónindegi Jol kartasy aıasyndaǵy ózara is-qımyldy jandandyrýǵa kelisti.

Qujat jetkiziletin ónim túrlerin keńeıtýdi, sondaı-aq ózara saýda kólemin arttyrý boıynsha qosymsha sharalar qabyldaýdy kózdeıdi.

Yntymaqtastyqtyń mańyzdy baǵyttarynyń biri — aýyl sharýashylyǵy salasyndaǵy ózara is-qımyl jónindegi Qazaqstan-Qyrǵyzstan jumys tobynyń qyzmeti.

— Qyrǵyz Respýblıkasy Qazaqstanmen agroónerkásiptik keshen salasyndaǵy yntymaqtastyqty damytýǵa úlken mán beredi. Biz óndiristik kooperatsııany damytýǵa da múddelimiz. Qol jetkizilgen ýaǵdalastyqtar men birlesken jobalardy iske asyrý qolda bar áleýetti tolyq paıdalanýǵa jáne elderimiz arasyndaǵy ózara is-qımyldy jańa deńgeıge shyǵarýǵa múmkindik beretinine senimdimin, — dep atap ótti Erlıst Akýnbekov.

Kezdesý qorytyndysy boıynsha mınıstrler aýyl sharýashylyǵy salasyndaǵy yntymaqtastyqty odan ári nyǵaıtýǵa jáne eki el arasyndaǵy ózara tıimdi baılanystardy keńeıtýge daıyn ekenderin jetkizdi. 

Aıta ketelik Qazaqstanda aýyl sharýashylyǵy tehnıkasynyń tozýy 65%-ǵa deıin tómendeıtini týraly jazǵan edik.