Qazaqstan men Qyrǵyzstan arasynda jańa áýe baǵdary ashylady
ASTANA. KAZINFORM — «Qazaeronavıgatsııa» RMK «Qyrǵyzaeronavıgatsııa» MM-men birlesip Almaty men Qarakól arasynda Santash asýy arqyly jańa áýe baǵytyn ashý týraly kelisimge qol qoıdy, dep habarlaıdy Kazinform menshikti tilshisi.
Qyrǵyz Respýblıkasynyń azamattyq avıatsııa memlekettik agenttiginiń málimetinshe, baǵyt taýly jaǵdaıda ushý qaýipsizdigi men tıimdiligin qamtamasyz etip otyratyn IKAO-nyń qazirgi zamanǵy talaptary men RNAV-5 navıgatsııalyq sıpattamasy eskerilip ázirlengen.
— Jańa baǵyt sonaý 1970 jyldary bolǵan tarıhı baǵytty jańǵyrtyp, «Qarqyra-avtodorojnyı» shekara beketteriniń mańynan ótedi. Ushyrylym aldynda Beechcraft King Air 360 ushaǵynda birlesken jerdegi tekserý jáne ushý valıdatsııasy júrgizildi, bul baǵyttyń halyqaralyq standarttarǵa sáıkestigin rastady, — dep habarlady agenttik.
Buǵan deıin 25 tamyzdan bastap Qazaqstan men Qyrǵyzstan shekarasyndaǵy «Qarqara-avtomobıl» ótkizý pýnkti táýlik boıy jumys rejımine kóshkenin habarlaǵan bolatynbyz.
Sondaı-aq Qazaqstan men Qyrǵyzstan halyqaralyq avtobýs baǵytyn qalpyna keltirgenin jazdyq.