Qazaqstan men Qyrǵyzstan arasynda sheshimin tappaǵan eshqandaı másele bolmaýy kerek — Prezıdent
ASTANA. KAZINFORM — Joǵary memleketaralyq keńes qazaq-qyrǵyz qarym-qatynastaryna erekshe serpin beredi. Bul týraly Aqordada Qyrǵyzstan Prezıdenti Sadyr Japarovtyń saparyna oraı Joǵary memleketaralyq keńestiń otyrysynda Memleket basshysy Qasym-Jomart Toqaev aıtty.
«Búgin biz kópten kútken mańyzdy basqosýǵa jınaldyq. Eki el arasyndaǵy qarym-qatynastyń qarqyndy damýy osy keńesti ótkizýge yqpal etkeni sózsiz. Otyrys barysynda qazaq-qyrǵyz yntymaqtastyǵynyń eń ózekti máseleleri qaralady. Biz Qyrǵyzstan prezıdentimen shaǵyn quramda kelissóz ótkizdik. Qarym-qatynasty keńeıtýge beıildi ekenimizdi taǵy da rastadyq. Sadyr Nurǵojouly (Qyrǵyzstan Prezıdenti) eki el arasynda sheshimin tappaǵan eshqandaı másele bolmaýy kerektigin aıtty. Men bul pikirmen tolyq kelisemin», — dedi Qasym-Jomart Toqaev.
Memleket basshysy ýaqyt synaǵynan ótken yqpaldastyǵymyzdyń keleshegi zor ekenine kámil senetinimin aıtty.
«Bul baǵytta bir kisideı kúsh jumyldyrýymyz qajet. Osy oraıda Joǵary memleketaralyq keńestiń jumysy qazaq-qyrǵyz qarym-qatynastaryn damytýǵa erekshe serpin beredi dep senemin. Sondaı-aq bul qadam áriptestigimizdi jańa deńgeıge kóteredi dep esepteımin», — dedi Qazaqstan Prezıdenti.
Budan buryn habarlanǵandaı, búgin Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty Aqordada kútip aldy.
Keshe, 18 sáýir kúni Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty elorda áýejaıynda kútip alǵan bolatyn.
Astanada Qasym-Jomart Toqaev pen Sadyr Japarov eki el ónerpazdarynyń gala-kontsertin tamashalady.
Sondaı-aq, elordada Qyrǵyz Respýblıkasynyń Prezıdenti Sadyr Japarovtyń resmı sapary aıasynda Qazaqstannyń mádenıet jáne óner qaıratkerlerine Qyrǵyzstannyń memlekettik nagradalaryn tapsyrý rásimi ótti.
