Qazaqstan men Qyrǵyzstan arasynda barlyq másele boıynsha túsinistik bar – Erlan Qarın
ASTANA. KAZINFORM – Qyrǵyz Respýblıkasynyń Prezıdenti Sadyr Japarovtyń elimizdegi resmı sapary aıasynda qazaq-qyrǵyz zııalylary men shyǵarmashylyq ókilderiniń forýmy ótip jatyr. Sol forýmnyń jalpy otyrysyna Qazaqstannyń Memlekettik keńesshisi Erlan Qarın men Qyrǵyz Respýblıkasynyń Memlekettik hatshysy Sýıýnbek Kasmambetov qatysty.
Іs-sharada sóz alǵan Erlan Qarın qazaq-qyrǵyz baýyrlastyǵynyń túp tarıhyna toqtalyp, qos halyqtyń alyp perzentteri arasyndaǵy dostyqtyń ozyq úlgilerinen mysal keltirdi.
«Bul keleli keńesimiz Qyrǵyz Respýblıkasynyń Prezıdenti qurmetti Sadyr Nurǵojauly Saparovtyń elimizge resmı sapary aıasynda uıymdastyrylyp otyr. Sonymen qatar Qazaqstanǵa Qyrǵyz Respýblıkasynyń aqsaqaldary men ǵalymdardan, aqyn-jazýshylardan quralǵan úlken delegatsııa keldi», - dedi ol.
Memlekettik keńesshi qazaq-qyrǵyz tutastyǵynyń qandaı deńgeıde damyp jatqanyn eldegi tasqyn taǵy bir kórsetkenin eske saldy.
«Osy bir júrekten ótkizip, sanamen sezetin yqpaldastyq eki eldi árdaıym birlikte ustap keledi. Sonyń arqasynda qazaq pen qyrǵyz talaı qıyn-qystaý shaqta bir-birine qol ushyn sozyp, jabyqqanda jubatyp, toryqqanda qoldaý kórsetedi. Elge tótennen apat kelgende bir-birine kómegin ala júgiretin de eki el. Burynǵy ótkenniń bárin sanamalap jatpaı, sońǵy eki jaǵdaıdy aıtsaq ta, oǵan anyq kóz jetkizemiz. Bishkekte tótenshe jaǵdaı bolyp, jurtshylyq jylýdan taryqqanda Qazaqstan alǵashqylardyń biri bolyp qoldaý jasady. Al elimizde tabıǵı apat bolyp, qarǵyn sý kemerinen asqanda Qyrǵyzstan eń birinshi bolyp gýmanıtarlyq kómek jiberdi. Osy qıyn-qystaý kezde qol ushyn berip, nıetterińizdi kórsetkenderińizge árqashan rızashylyǵymyzdy aıtamyz. Bul da baýyrlastyqtyń, birliktiń, janashyrlyqtyń aıqyn kórinisi. Eń bastysy, Qazaqstan men Qyrǵyzstan arasynda barlyq másele boıynsha túsinistik bar. Saıası-ekonomıkalyq baılanystar qarqyndy damyp keledi, mádenı-gýmanıtarlyq qatynastar joǵary deńgeıde. Bul yntymaqtastyq aldaǵy ýaqytta da óz baǵytynan aınymaıdy dep senemiz. Búgingi jıyn da qos halyqtyń birligin bekemdeýge septigin tıgizetini sózsiz», - dedi Erlan Qarın.
Sonymen qatar sharada Qyrǵyzstannyń Memlekettik hatshysy Sýıýnbek Kasmambetov, Qazaqstan Parlamenti Májilisiniń depýtaty, Qazaqstannyń Eńbek Eri Baqtyqoja Іzmuhambetov, Qyrǵyz Respýblıkasy Prezıdentiniń janyndaǵy Memlekettik til jáne til saıasaty jónindegi ulttyq komıssııanyń tóraǵasy Melıs Mýratalıev, Qazaqtyń tuńǵysh ǵaryshkeri, Halyq Qaharmany Toqtar Áýbákirov, Qyrǵyz Respýblıkasy Ulttyq ǵylym akademııasynyń akademıgi Abdyldajan Akmatalıev, Qazaqstan Jazýshylar odaǵynyń tóraǵasy Mereke Qulkenov, «Mýras» Qyrǵyzstan halqynyń tarıhı jáne mádenı murasy qorynyń tóraǵasy Kyıas Moldokasymov sóz sóılep, óz oılaryn ortaǵa saldy.
Shyǵarmashylyqty shyńdaý, urpaqtar sabaqtastyǵy jáne eki eldiń rýhanı-mádenı murasyn saqtaýǵa qatysty ózekti máseleler talqylandy. Sonymen qatar ádebıet pen óner salasyndaǵy tyń bastamalar men yntymaqtastyqtyń anaǵurlym perspektıvti baǵyttary áńgimege arqaý boldy. Sóz sóıleýshiler qazaq pen qyrǵyzǵa ortaq mádenı qundylyqtar men salt-dástúr týraly kóp aıtty. Sonyń bir mysaly retinde eki jaqtyń syıly aqsaqaldaryna alma-kezek shapan jabyldy.
