Qazaqstan men Qyrǵyzstan 100 mıllıon dollarǵa jýyq kelisim jasamaq
ASTANA. KAZINFORM — Bul jóninde QazTrade saýda saıasatyn damytý ortalyǵynyń bas dırektory Nurlan Qulbatyrov Bishkekte ótken Qazaqstan men Qyrǵyzstannyń II óńiraralyq yntymaqtastyq forýmynda aıtty, dep habarlaıdy Kazinform agenttiginiń Bishkektegi menshikti tilshisi.
Onyń aıtýynsha, forýmǵa Qazaqstannyń 80-ge jýyq kásipkeri qatysyp, Qyrǵyzstan naryǵyna eksporttaýǵa áleýeti joǵary otandyq ónimderin tanystyryp jatyr.
Spıkerdiń sózinshe, osy jyldyń segiz aıynda eki el arasyndaǵy taýar aınalymy 19,2 paıyz ósip, 1,7 mlrd dollarǵa jetken. Onyń ishinde Qazaqstan eksporty 1,1 mlrd dollar bolyp, 15 paıyzǵa artqan.
— Qazaqstannyń Qyrǵyzstanǵa eksporttaıtyn ónimderiniń negizgi úlesi bes óńirge tıesili. Óńiraralyq forým óńirler arasyndaǵy baılanysty nyǵaıtyp, týrızmdi damytý, ınvestıtsııa tartý jáne óndiristik yntymaqtastyqty jolǵa qoıý máselelerin talqylaýǵa múmkindik beredi, — dedi ol.
Sondaı-aq spıker eki el ekonomıkasynyń birin-biri tolyqtyratynyn atap ótti.
— Qazaqstan Qyrǵyzstanǵa bıdaı, un jáne azyq-túlik taýarlaryn eksporttaıdy. Al Qyrǵyzstannan elimizge sút ónimderi jetkiziledi. Eki eldiń de Eýrazııalyq ekonomıkalyq odaqqa múshe bolýy saýda baılanysyn jeńildetip, Ortalyq Azııa aıasyndaǵy ekonomıkalyq yntymaqtastyqty damytýǵa múmkindik beredi, — dedi ol.
Nurlan Qulbatyrovtyń aıtýynsha, qazirgi taýar aınalymy eki eldiń saýda áleýetin tolyq qamtymaıdy. Sondyqtan Qazaqstan men Qyrǵyzstan kásipkerleriniń tikeleı aralasyp, iskerlik baılanys ornatýy mańyzdy. Ol mundaı forýmdar ekijaqty yntymaqtastyqty damytýǵa tyń serpin beretinin aıtty.
— Keshe jáne búgin B2B formatynda kezdesýler ótip jatyr. Aldyn ala málimet boıynsha, jalpy somasy 100 mln dollarǵa jýyq kelisimshartqa qol qoıylady dep josparlanǵan. Kezdesý qorytyndysynda bul soma odan ári artýy múmkin, — dep túıindedi ol.
Buǵan deıin Qazaqstan men Qyrǵyzstan forým aıasynda qandaı qujattarǵa qol qoıǵanyn habarlaǵan bolatynbyz.
Sondaı-aq Qazaqstan men Qyrǵyzstan saýda kólemin 3 mlrd dollarǵa jetkizýdi kózdeıtinin jazǵan edik.
