Qazaqstan men Kıpr yntymaqtastyǵynyń mańyzdy máseleleri talqylandy
NUR-SULTAN. QazAqparat - Elordada QR Syrtqy ister mınıstri Beıbit Atamqulov Kıprdiń Syrtqy ister mınıstri Nıkos Hrıstodýlıdıspen kezdesti, dep habarlaıdy QazAqparat tilshisi.
«Búgin biz ashyqtyq pen ózara túsinistik rýhynda Kıpr Respýblıkasynyń Syrtqy ister mınıstri Nıkos Hrıstodýlıdıspen óte tabysty kelissózderdi ótkizdik. Kelissózder barysynda biz ekijaqty yntymaqtastyqtyń mańyzdy máselelerin talqyladyq. Saıası, saýda-ekonomıkalyq, mádenı-gýmanıtarlyq salalarda naqty josparlardy belgiledik. Sondaı-aq, halyqaralyq arenadaǵy ózara is-qımyldyń ortaq ustanymdaryna qol jetkizdik», - dedi Beıbit Atamqulov kezdesýden keıin tilshiler úshin ótkizgen jıynda.
Vedomstvo basshysy óz sózinde Qazaqstan Kıprdi dástúrli túrde Ońtústik Eýropa aımaǵyndaǵy mańyzdy seriktesterdiń biri sanaıtynyn atap ótti.
«Biz ózara saıası is-qımylymyzdy odan ary tereńdetýge degen ustanymymyzdy rastaımyz. Nıkosııa Qazaqstannyń EQYU-daǵy, BUU-daǵy jáne basqa da halyqaralyq alańdardaǵy halyqaralyq jáne aımaqtyq bastamalaryn turaqty negizde qoldaıdy», - dedi ol.
Mınıstrdiń aıtýynsha, eki el arasyndaǵy áriptestiktiń áleýeti mol baǵyttary retinde energetıka salasy, qurylys, ınnovatsııa, azyq-túlik ónerkásibi, aýyl sharýashylyǵy, týrımz salalary bolyp sanalady.
«Qazaqstan-Kıpr qarym-qatynastarynyń spektri biz qozǵaǵan máselelermen shektelip qalmaıdy. Bizdiń qol jetkizgen ýaǵdalastyqtarymyz ózara yntymaq úshin jańa múmkindikter ashatynyna senimdimin», - dep túıdi Beıbit Atamqulov.
Óz kezeginde Kıprdiń Syrtqy ister mınıstri Nıkos Hrıstodýlıdıs Qazaqstan tarapymen qol qoıylǵan ózara túsinistik týraly memorandýmdar eki eldiń arasyndaǵy dıalogty jaqsarta túsetinin atap ótti.
«Ortaq múdde úshin bul memorandýmdardyń mańyzy zor. Búgingi kúni men áriptesime (Beıbit Atamqulov - avt.) ártúrli saladaǵy qarym-qatynasty nyǵaıtý úshin arnaıy jol kartasyn ázirleýdi usyndym. Áriptesim qoldap otyr. Ekijaqty qarym-qatynas jasaýdyń mol áleýeti bar», - deıdi Kıpr mınıstri.
Kezdesý sońynda eki eldiń mınıstrleri yntymaqtastyq jáne ekijaqty saıası keńes týraly memorandýmǵa qol qoıdy. Al keshke QR pen KR Úkimetteriniń eki jaqty salyq salýdy boldyrmaý, salyqtan jaltarýdy aldyn alý týraly Konventsııasyna qol qoıylady.
