Qazaqstan men Kıpr vızasyz rejım engizý máselesin talqylady
ASTANA. KAZINFORM – Qazaqstan men Kıpr Syrtqy ister mınıstrleri vızasyz rejımdi engizýdi, sondaı-aq eki el arasyndaǵy tikeleı áýe qatynasynyń perspektıvalaryn talqylady.
Kıpr Respýblıkasynyń Syrtqy ister mınıstri Konstantınos Kombostyń Qazaqstanǵa sapary barysynda eki eldiń syrtqy saıası vedomstvolarynyń basshylary Qazaqstan men Kıpr arasyndaǵy «Áýe qatynasy týraly» memorandýmǵa qol qoıdy.
QR Syrtqy ister mınıstri Murat Nurtileý bul qujat eki el arasyndaǵy yntymaqtastyqty keńeıtýge qosymsha serpin beredi dep esepteıdi.
– Áriptesimmen azamattarymyz úshin vızasyz rejımdi engizýdi jáne eki el arasyndaǵy tikeleı áýe qatynasynyń keleshegin talqyladyq. Osy turǵyda pikirler men bastamalar jaqyn arada iske asyrylatynyna senemin, - dedi QR SІM basshysy.
Ol talqylaýdyń taǵy bir mańyzdy taqyryby – aımaqtyq jáne jahandyq kún tártibi ekenin jetkizdi.
Murat Nurtileýdiń aıtýynsha, Qazaqstan men Kıprdiń halyqaralyq máseleler boıynsha ustanymdary óte uqsas.
