Qazaqstan men Kıpr SІM basshylary telefon arqyly sóılesti
ASTANA. KAZINFORM – Kıpr tarapynyń bastamasymen Qazaqstan Respýblıkasynyń Syrtqy ister mınıstri Ermek Kósherbaev Kıpr Respýblıkasynyń Syrtqy ister mınıstri Konstantınos Kombospen telefon arqyly sóılesti. Bul týraly Syrtqy ister mınıstrliginiń baspasóz qyzmeti habarlady.
Kelissózder barysynda K.Kombos qazaq áriptesin taǵaıyndalýymen quttyqtap, Qazaqstan men Kıpr syrtqy saıası vedomstvolar basshylyǵynyń arasyndaǵy turaqty jáne syndarly dıalogtyń saqtalýyna úmit bildirdi.
QR SІM basshysy kólik, logıstıka, tsıfrlandyrý, aýyl sharýashylyǵy, týrızm jáne bilim berý sııaqty salalardaǵy yntymaqtastyqtyń eleýli áleýetin nazarǵa alyp, Qazaqstannyń Kıprmen seriktestik qatynastardy údemeli túrde nyǵaıtýǵa múddeliligin atap ótti.
Osy turǵyda taraptar saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy qazaq-kıpr yntymaqtastyǵynyń qazirgi jaǵdaıy men odan ári damý perspektıvalaryn talqylap, halyqaralyq kún tártibi jáne halyqaralyq pen óńirlik uıymdar aıasyndaǵy eki eldiń ózara is-qımylynyń ózekti máseleleri boıynsha pikir almasty.
Eske sala keteıik, buǵan deıin Erjan Ashyqbaev Syrtqy ister mınıstriniń birinshi orynbasary laýazymyna taǵaıyndalǵanyn jazǵanbyz.