Qazaqstan men Kıpr qandaı kelisimderge qol qoıdy
ASTANA. KAZINFORM — Kıpr Prezıdenti Nıkos Hrıstodýlıdıstiń Qazaqstanǵa resmı sapary aıasynda eki eldiń bilim, ǵylym, tsıfrlandyrý, mádenıet, sport jáne ınvestıtsııa salalaryndaǵy yntymaqtastyqty damytýǵa baǵyttalǵan memorandýmdar men kelisimderge qol qoıyldy.
Táýelsizdik saraıynda Qazaqstan Prezıdenti Qasym-Jomart Toqaev pen Kıpr Prezıdenti Nıkos Hrıstodýlıdıstiń keńeıtilgen kelissózderinen keıin ekijaqty qujattarmen almasý rásimi ótti.
Atap aıtqanda, QR Syrtqy ister mınıstri Ermek Kósherbaev jáne Kıpr Respýblıkasynyń Syrtqy ister mınıstri Konstantınos Kombos Joǵary jáne joǵary oqý ornynan keıingi bilim berý men ǵylym salalaryndaǵy yntymaqtastyq týraly vedomstvoaralyq memorandým almasty.
QR Premer-Mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev pen Kıprdiń Zertteýler, ınnovatsııalar jáne tsıfrlyq saıasat jónindegi mınıstriniń orynbasary Nıkodemos Damıaný Aqparattyq-kommýnıkatsııalyq tehnologııalar, elektrondy úkimet qyzmetteri, ǵarysh qyzmeti jáne kıberqaýipsizdik salalaryndaǵy yntymaqtastyq týraly vedomstvoaralyq memorandým almasty.
QR Premer-Mınıstriniń orynbasary — Mádenıet jáne aqparat mınıstri Aıda Balaeva jáne Kıpr Respýblıkasynyń Syrtqy ister mınıstri Konstantınos Kombos Mádenı yntymaqtastyq týraly vedomstvoaralyq memorandýmmen almasty.
QR Týrızm jáne sport mınıstri Erbol Myrzabosynov jáne Kıpr Respýblıkasynyń Syrtqy ister mınıstri Konstantınos Kombos Sport salasyndaǵy yntymaqtastyq týraly vedomstvoaralyq memorandým almasty.
Qazaqstannyń Halyqaralyq saýda palatasy basqarmasynyń tóraǵasy Murat Qarymsaqov jáne Kıpr Saýda jáne ónerkásip palatasynyń prezıdenti Stavros Stavrý Investıtsııalyq jáne iskerlik baılanystardy nyǵaıtý jónindegi yntymaqtastyq týraly kelisim almasty.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi. Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy.
Buǵan deıin Qasym-Jomart Toqaev Kıpr prezıdentin І dárejeli Dostyq ordenimen marapattaǵan edi.
