Qazaqstan men QHR parlamentshileri ekijaqty yntymaqtastyqty talqylady

BEIJІŃ. QazAqparat - Búgin Qazaqstan Parlamenti Májilisi tóraǵasynyń orynbasary Gúlmıra Isımbaeva bastaǵan delegatsııa  músheleri Jalpyqytaılyq halyq ókilderi jınalysy Turaqty komıtetiniń tóraǵasy Van Chenmen kelissóz júrgizdi, dep habarlaıdy Qytaıdaǵy «QazAqparat» HAA tilshisi.

«Qytaı men Qazaqstan - dostas ári shekaralas elder jáne de ózara tıimdi áriptester. Dıplomatııalyq qarym-qatynastar ornatylǵannan beri 26 jyl boıy iskerlik baılanystar joǵary deńgeıde jalǵasyp keledi.

Eki memleket basshylary - QHR Tóraǵasy Tszınpın men Qazaqstan Prezıdenti  Nursultan Nazarbaevtyń jetekshiligimen  elder arasynda eki jaqqa da tıimdi baılanystar negizinde jan-jaqty strategııalyq yntymaqtastyq damýda, ol jańa deńgeıge kóterildi», -  dedi kezdesý barysynda Van Chen.

Óz tarapynan G. Isımbaeva Van Chendi Qytaı Halyqtyq saıası konsýltatıvtik keńesi sessııasynyń jáne  Jalpyqytaılyq halyq ókilderi jınalysynyń tabysty ótýimen qutttyqtady.

Sondaı-aq ol 2012 jyly Qazaqstan Prezıdenti Nursultan Nazarbaev jáne QHR Tóraǵasy Tszınpın - 17 ret, eki eldiń úkimet basshylary - 8 ret, parlament jetekshileri  2 ret kezdeskenin eske saldy.

«Bıylǵy jyldyń qańtar-aqpanynda Qazaqstan men Qytaı arasyndaǵy taýar aınalymy 1, 7 mrd dollardy qurady, bul ótken jyldyń sáıkes kezeńimen salystyrǵanda 32,3 protsent joǵary»,- dedi G. Isımbaeva.