Qazaqstan men QHR ekonomıkalyq baǵdarlamalaryn ushtastyrý josparyna qol qoıyldy
ASTANA. QazAqparat - Elbasy Nursultan Nazarbaevtyń Qytaı Halyq Respýblıkasyna jumys sapary aıasynda QR Úkimeti men Qytaı Halyq Respýblıkasynyń Úkimeti arasyndaǵy «Nurly Jol» jańa ekonomıkalyq saıasatyn jáne «Jibek jolynyń ekonomıkalyq beldeýin» ushtastyrý jónindegi yntymaqtastyq josparyna qol qoıdy.
Bul týraly QR Ulttyq ekonomıka mınıstrliginiń baspasóz qyzmetinen habarlady.
Qujatty Qazaqstan tarapynan Ulttyq ekonomıka mınıstri Qýandyq Bıshimbaev, Qytaı tarapynan QHR Damý jáne reformalar jónindegi memlekettik komıtetiniń tóraǵasy Sıýı Shaoshı rásimdegen.
«Qazaqstannyń Qytaımen yntymaqtastyǵynyń strategııalyq sıpatyn jáne osy eldiń ınvestıtsııalyq áleýetin eskere otyryp, Jospardy iske asyrý eki el arasyndaǵy saýda-ekonomıkalyq yntymaqtastyqty belsendendirýge jáne keńeıtýge múmkindik beredi. Atalǵan qujat ınfraqurylym, ınvestıtsııalar jáne saýda, ónerkásip, kólik jáne týrızm salalaryndaǵy ekijaqty yntymaqtastyqtyń aıtarlyqtaı keńeıýin boljamdaıdy. Taraptar avtojoldar salýǵa jáne Qazaqstan aýmaǵyndaǵy avtojol ınfraqurylymyn jańǵyrtýǵa, sondaı-aq Qytaı Halyq Respýblıkasy-Eýropa jáne keri baǵdar boıynsha temirjol magıstralin salý men jańǵyrtýǵa kásiporyndardyń qatysýyn belsendi túrde kótermeleýge nıettenedi. Odan basqa, qujat eki eldiń aýmaǵynda, sol sııaqty úshinshi elderde logıstıkalyq termınaldaryn damytýda kásiporyndarǵa qoldaý kórsetýdi boljamdaıdy, úshinshi elder Qazaqstan men Qytaıdyń eksporttyq-ımporttyq áleýetin ulǵaıtýǵa yqpal etetin bolady», - delingen habarlamada.
Qol qoıylǵan jospar aıasynda Qazaqstan men Qytaı ındýstrııanyń jańa býyn bıotehnologııasy, energııanyń jańa kózderi jáne jańa materıaldar sııaqty salalaryndaǵy yntymaqtastyqty nyǵaıtýǵa nıetti. Elder ınjınırıng tehnıkasy men avtomobıl ónerkásibin óndirý salasyndaǵy yntymaqtastyq aýqymyn keńeıtýdi josparlap otyr.
Sondaı-aq, qujat týrızm jáne kommýnaldyq sharýashylyq pen sýmen jabdyqtaý júıeleri salasyndaǵy ınfraqurylymdy salý aıasyndaǵy yntymaqtastyqty nyǵaıtýǵa baǵyttalǵan. Qytaı tarapy Qazaqstannyń qalalyq jylý jáne sýmen jabdyqtaý jelisin qaıta qurýdy jáne jańǵyrtýdy qoldaıdy.
Jalpy, eń aldymen, memleket jáne úkimet basshylarynyń turaqty kezdesýleri arqyly, sondaı-aq «Jibek jolynyń ekonomıkalyq beldeýi» bastamasynyń sheńberindegi Qazaqstan men Qytaıdyń birlesken jobalary boıynsha jumystyń bastalýyna baılanysty, Qazaqstan men Qytaı arasyndaǵy ekijaqty qarym-qatynastyń jandana túskenin atap ótken jón.
