Qazaqstan men Kenııa túrli saladaǵy naqty jobalardy birlesip júzege asyrýǵa daıyn
ASTANA. KAZINFORM — Qazaqstan men Kenııa túrli saladaǵy naqty jobalardy birlesip júzege asyrýǵa daıyn. Bul týraly elimizge memlekettik saparmen kelgen Kenııa Respýblıkasynyń Prezıdenti Ýılıam Rýtomen kelissózderden keıin BAQ ókilderine málimdeme jasaǵan Memleket basshysy Qasym-Jomart Toqaev aıtty.
— Sonymen qatar kelissóz barysynda halyqaralyq máseleler jóninde pikir almastyq. Afrıka qurlyǵyndaǵy jáne Taıaý Shyǵystaǵy ahýaldy talqyladyq. Naırobı aımaqtyq qaqtyǵystardy retteýdi kózdeıtin bitimgerlik bastamalarǵa belsendi qoldaý kórsetýde. Sondaı-aq Kenııa Afrıkadaǵy beıbitshilik pen turaqtylyqty nyǵaıtý úshin júıeli jumys júrgizip keledi. Biz muny joǵary baǵalaımyz. Álemdegi kóptegen túıtkilge qatysty Qazaqstan men Kenııanyń ustanymdary uqsas. Eki el de halyqaralyq máselelerdi tek beıbit, dıplomatııalyq jolmen, ıaǵnı kelissózder arqyly sheshý kerek dep esepteıdi. Biz BUU jáne basqa da halyqaralyq qurylymdar aıasyndaǵy yqpaldastyǵymyzdy kúsheıtýge kelistik, — dedi Qasym-Jomart Toqaev.
Prezıdenttiń paıymynsha, búgingi kelissózder nátıjeli ári mazmundy boldy deýge tolyq negiz bar.
— Biz Qazaqstan men Kenııa arasyndaǵy baılanysty nyǵaıtýǵa, ózara tıimdi seriktestikti keńeıtýge jáne túrli saladaǵy naqty jobalardy birlesip júzege asyrýǵa daıynbyz. Bul eki eldiń múddesine de saı keledi. Prezıdent Rýtonyń elimizge jasaǵan memlekettik saparynyń mán-mańyzy zor. Bul qadam ózara qarym-qatynasymyzǵa tyń serpin beredi dep senemin. Sonymen birge Ortalyq Azııa men Afrıka arasyndaǵy yntymaqtastyqty damytýǵa jol ashady dep oılaımyz. Kenııa Prezıdenti saparynyń aıasynda men Rýtoǵa elimizdiń joǵary marapatynyń biri, ıaǵnı 1-dárejeli «Dostyq» ordenin tapsyrdym. Elderimizdiń dostyǵy nyǵaıa bersin, — dedi Memleket basshysy.
Buǵan deıin Memleket basshysy Qasym-Jomart Toqaevtyń elimizge memlekettik saparmen kelgen Kenııa Respýblıkasynyń Prezıdenti Ýılıam Rýtony Táýelsizdik saraıynda resmı qarsy alý rásimi ótken edi.
