Qazaqstan men Qatar strategııalyq seriktestikti nyǵaıtý týraly kelissóz júrgizdi
ASTANA. KAZINFORM – Qazaqstan Respýblıkasynyń Syrtqy ister mınıstri Ermek Kósherbaevtyń Qatar memleketine resmı sapary barysynda Qatardyń Premer-Mınıstri ári Syrtqy ister mınıstri sheıh Muhammed ben Abdýlrahman Ál Tanımen kelissózder ótti.
Kezdesý barysynda eki tarap qazaq-qatar strategııalyq seriktestiginiń qazirgi jaǵdaıy men onyń damý múmkindikterin talqylady. Negizgi nazar saıası dıalogty nyǵaıtýǵa, saýda-ekonomıkalyq jáne ınvestıtsııalyq yntymaqtastyqty keńeıtýge, sondaı-aq mádenı-gýmanıtarlyq baılanystardy damytýǵa aýdaryldy.
Joǵary deńgeıdegi turaqty saıası dıalog ekijaqty qatynastardy alǵa jyljytý jáne burynǵy kelisimderdi júzege asyrýda mańyzdy ról atqaratyny aıtyldy.
Investıtsııalyq yntymaqtastyq máseleleri de keńinen qaraldy. Energetıka, telekommýnıkatsııalar, tsıfrlyq tehnologııalar, aýyl sharýashylyǵy, kólik-logıstıka jáne basqa da basym salalardaǵy birlesken jobalardyń ýaqtyly jáne sapaly iske asyrylýynyń mańyzy atap ótildi.
Ermek Kósherbaev Qatardy Qazaqstannyń arab álemindegi senimdi jáne jaqyn áriptesi retinde sıpattap, ekijaqty qatynastardyń strategııalyq sıpaty men ózara senim deńgeıin joǵary baǵalady.
Sheıh Muhammed ben Abdýlrahman Ál Tanı Qazaqstan men Qatar arasyndaǵy qatynastardyń damý qarqynyn oń baǵalap, strategııalyq seriktestikti odan ári nyǵaıtýǵa jáne yntymaqtastyqtyń negizgi baǵyttary boıynsha birlesken bastamalardy júzege asyrýǵa daıyndyqtaryn bildirdi.
Mádenı-gýmanıtarlyq saladaǵy yntymaqtastyq ta talqylandy. Bıylǵy jyldyń aqpan aıynda Qatarda ótken Qazaqstan mádenıeti kúnderiniń eki el halyqtary arasyndaǵy ózara túsinistikti arttyrýǵa yqpal etkeni atap ótildi.
Sonymen qatar taraptar týrıstik aǵyndardyń ósýin atap, Qazaqstan men Qatar arasyndaǵy tikeleı áýe qatynasyn damytý qajettigin aıtty. Bul eki el arasyndaǵy baılanystardy ári qaraı nyǵaıtýǵa múmkindik beredi.
Buǵan deıin SІM basshysy Islam yntymaqtastyǵy uıymymen ózara is-qımyldy jalǵastyrýǵa keliskenin jazǵanbyz.
