Qazaqstan men Qatar quny $17,6 mlrd bolatyn ınvestjobalardy iske asyrýǵa kiristi
DOHA. KAZINFORM — Qazaqstan Respýblıkasynyń Premer-Mınıstri Oljas Bektenov jumys saparymen Qatar memleketine bardy.
Dohada Oljas Bektenovti Qatar Ámiri sheıh Támım ben Hamad Ál Tánı qabyldady. QR Premer-Mınıstri Memleket basshysy Qasym-Jomart Toqaevtyń shynaıy sálemi men men izgi tilekterin jetkizdi.
Kezdesý barysynda qazaq-qatar qatynastary yntymaqtastyqtyń barlyq baǵyttary boıynsha jáne joǵary qarqynmen nyǵaıyp kele jatqany atap ótildi. Bıylǵy aqpan aıynda ótken Qazaqstan Prezıdenti Qasym-Jomart Toqaev pen Qatar Ámiri sheıh Támım ben Hamad Ál Tánı arasyndaǵy kelissózder eki eldiń yntymaqtastyqty jańa strategııalyq deńgeıge kóterýge degen ózara umtylysyn rastady.
Sapar aıasynda Oljas Bektenov Qatar Premer-Mınıstri — syrtqy ister mınıstri sheıh Muhammed ben Abdýrahman Ál Tánımen shaǵyn jáne keńeıtilgen quramda kelissózder júrgizdi.
Úkimetaralyq kezdesýlerdiń máni eki memleket basshylary qol jetkizgen ýaǵdalastyqtardyń oryndalý barysy, sondaı-aq energetıka, aýyl sharýashylyǵy jáne t. b. salalar boıynsha ınvestıtsııalyq jobalardyń sapaly ári ýaqtyly iske asyrylýyna járdemdesý boldy.
«Qatar — Qazaqstannyń arab álemindegi mańyzdy ekonomıkalyq seriktesi. Memleket basshysy Qasym-Jomart Toqaevtyń Qatarǵa sapary sheńberinde qol jetkizilgen ýaǵdalastyqtar bizdiń ınvestıtsııalyq yntymaqtastyǵymyzdy sapaly jańa kezeńge shyǵarady. Biz buryn-sońdy bolmaǵan qomaqty soma $17,6 mlrd-ty quraıtyn aýqymdy jáne strategııalyq mańyzdy ınvestıtsııalyq jobalardy iske asyrý aldynda turmyz», — dep atap ótti Oljas Bektenov.
Premer-Mınıstr Oljas Bektenov kezdesý barysynda Qazaqstannyń Qatar naryǵyna halal jáne organıkalyq aýyl sharýashylyǵy ónimderin jetkizý boıynsha seriktes bolýǵa daıyn ekenin málimdedi. Qazirgi ýaqytta qazaqstandyq kásiporyndar AÓK salasyndaǵy jobalardy iske asyrý boıynsha qatarlyq kompanııalarmen yntymaqtastyq ornatýda.
Óz kezeginde Qatar Premer-Mınıstri — syrtqy ister mınıstri saýda-ekonomıkalyq jáne ınvestıtsııalyq yntymaqtastyqty odan ári arttyrýǵa múddeli ekenin rastady.
«Elderimiz arasyndaǵy ózara is-qımyldy nyǵaıtýǵa jaqsy saıası negiz bar. Memleketterimizdiń basshylary buǵan deıingi sapar barysynda yntymaqtastyqty joǵary deńgeıge shyǵaryp, birqatar birlesken jobalardy iske asyrýǵa daıyn ekenderin bildirdi. Búgingi kezdesýimiz joǵary deńgeıde qol jetkizilgen kelisimderdi júzege asyrýǵa múmkindik beredi. Óz tarapymyzdan biz ekijaqty is-qımyldy keńeıtip, tereńdetý úshin jańa baǵyttardy zertteýge daıynbyz», — dedi sheıh Muhammed ben Abdýrahman Ál Tánı.
Budan bólek, taraptar mádenıet jáne bilim berý, azamattyq avıatsııa jáne týrızm salasyndaǵy ózara is-qımyl máselelerin talqylady.
Kelissóz qorytyndysy boıynsha Qazaqstan Respýblıkasy men Qatar memleketiniń úkimetteri arasynda negizgi salalardaǵy jobalardy damytý úshin uzaq merzimdi strategııalyq áriptestik ornatý týraly kelisimge qol qoıyldy. Іri ınvestıtsııalyq jobalardyń ishinde:
-
jalpy somasy shamamen $5,7 mlrd bolatyn gaz óńdeý zaýyttaryn salý jónindegi jobalar. Olardy iske asyrý ishki naryqty tolyqtyrýǵa jáne taýarlyq gazdyń eksporttyq kólemin ulǵaıtýǵa múmkindik beredi;
-
Qazaqstan óńirlerin gazben jabdyqtaýdy damytýǵa, iri kásiporyndar men soltústik oblystardyń turǵyndaryna tabıǵı gaz jetkizýdi qamtamasyz etýge, sondaı-aq eldiń eksporttyq múmkindikterin keńeıtýge baǵyttalǵan jalpy somasy shamamen $7,7 mlrd bolatyn «Aqtóbe — Qostanaı» magıstraldyq gaz qubyrynyń jáne «Beıneý — Bozoı — Shymkent» gaz qubyrynyń ekinshi jelisin salý jónindegi jobalar;
-
Qazaqstannyń uzaqmerzimdi energetıkalyq qaýipsizdigin qamtamasyz etýge baǵyttalǵan jalpy somasy shamamen $2,7 mlrd bolatyn qýaty 1 100 MVt bý-gaz qondyrǵysy negizinde elektr stansasyn jáne 350 MVt-tyq sý elektr stansasyn salý jónindegi jobalar;
-
sondaı-aq bıdaı, burshaq jáne sútti tereń óńdeý zaýyttaryn salý boıynsha jobalar.
Úkimetter basshylary Oljas Bektenov pen sheıh Muhammed ben Abdýrahman Ál Tánı kelisimge qol qoıýdyń tolyq formattaǵy jáne ózara tıimdi yntymaqtastyqty odan ári damytý úshin mańyzy zor ekenin atap ótti.
