Qazaqstan men Qatar ınvestıtsııalyq yntymaqtastyqty keńeıtýge nıetti

DOHA. QazAqparat – XX Doha halyqaralyq forýmyna qatysý úshin Qatar Memleketine sapary aıasynda Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Qatardyń memlekettik organdary men iri kompanııalarynyń basshylarymen birqatar ekijaqty kezdesý ótkizdi.

Qatar Memleketiniń Indýstrııa jáne saýda mınıstri – Joǵary deńgeıdegi Qazaqstan-Qatar birlesken komıssııasynyń teń tóraǵasy sheıh Muhammed bın Hamad Ál Tanımen kelissóz barysynda taraptar saýda-ekonomıkalyq baılanystardy odan ári damytý jáne memleketter arasyndaǵy ekijaqty saýda aınalymyn ulǵaıtý qajettigin atap ótti.

Osy turǵyda Úkimetaralyq komıssııanyń múmkindikterin paıdalanýdyń mańyzdylyǵy atap ótildi, onyń kelesi 6-shy otyrysyn aǵymdaǵy jyly Doha qalasynda ótkizý josparlanyp otyr.

QR SІM basshysy Qatar Qazaqstannyń arab álemindegi mańyzdy saıası jáne ekonomıkalyq áriptesi ekenin málimdedi.

«Elderimiz arasynda joǵary saıası deńgeıde ashyq jáne senimdi dıalog ornaǵan. Birlesken kúsh-jigerimizben yntymaqtastyǵymyzdy damýdyń sapaly jańa satysyna kóteretinimizge senimdimiz», - dedi M.Tileýberdi.

Taraptar birlesken is-sharalar kestesin, onyń ishinde Qatar Ámiri sheıh Tamım ben Hamad Ál Tanıdiń Qazaqstanǵa aldaǵy memlekettik sapary qarsańynda Qazaqstan-Qatar ınvestıtsııalyq forýmyn jáne Astana Financial Days sheńberinde Qatar kúnin ótkizýdi talqylady.

Mınıstr M.Tileýberdi sondaı-aq «Qatar Investment Authority» Qatar ınvestıtsııalyq qorynyń Basqarma tóraǵasy Mansýr ál-Mahmýd, Qatar bıznesmenderi qaýymdastyǵynyń tóraǵasy, «Faisal Holding» basshysy sheıh Feısal ben Kasım ál-Tanı, «Power International Holding» Basqarma tóraǵasy Mýtaz Ál-Haııatpen bólek kezdesýler ótkizdi. Osy kezdesýler barysynda birlesken ınvestıtsııalyq qor qurý jáne taý-ken ónerkásibi, aýyl sharýashylyǵy, medıtsına jáne týrızm salasyndaǵy birqatar iri ınvestıtsııalyq jobalardy iske asyrý máseleleri talqylandy.