Qazaqstan men Qatar eńbek mıgranttarynyń quqyqtaryn qorǵaý jónindegi yntymaqtastyqty rastady
ASTANA.KAZINFORM – Kelisim Qazaqstan azamattaryn Katarda jumysqa ornalastyrýdyń qaýipsiz jáne ashyq jaǵdaılaryn jasaýǵa jáne olardyń quqyqtyq jáne áleýmettik qorǵalýyn qamtamasyz etýge baǵyttalǵan. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Qatar Syrtqy ister mınıstrligi dıplomatııalyq arnalar boıynsha Qazaqstan Respýblıkasynyń Úkimeti men Qatar Memleketiniń Úkimeti arasyndaǵy qazaqstandyq jumyskerlerdiń osy elde jumysqa ornalasýyn retteý týraly Kelisimdi oryndaý jónindegi memleketishilik rásimderdiń oryndalǵanyn rastaıtyn jazbasha habarlama jiberdi. Osylaısha, atalǵan Kelisim kúshine endi.
Qujatqa 2024 jylǵy 14 aqpanda Memleket basshysynyń Dohaǵa resmı sapary barysynda qol qoıyldy. 2025 jyly kelisimdi ratıfıkatsııalaý týraly zań jobasyn Parlamenttiń qos palatasy (10 qyrkúıek – Májiliste, 9 qazan – Senatta) maquldady, 20 qazanda zańǵa Qazaqstan Respýblıkasynyń Prezıdenti qol qoıdy.
Kelisim Qazaqstan azamattaryn Katarda jumysqa ornalastyrýdyń qaýipsiz jáne ashyq jaǵdaılaryn jasaýǵa jáne olardyń quqyqtyq jáne áleýmettik qorǵalýyn qamtamasyz etýge baǵyttalǵan.
Qujat mamandardy irikteýge ótinimder almasýdyń, olardyń biliktiligin tekserýdiń jáne eńbek sharttaryn jasasýdyń naqty tártibin bekitedi. Kelisim qazaqstandyq jumyskerlerge úlgilik eńbek shartyna sáıkes ushýǵa, turǵyn úıge jáne medıtsınalyq qyzmet kórsetýge aqy tóleý, eńbektiń, demalystyń jáne syıaqynyń naqty sharttary, shartty merziminen buryn buzǵan kezdegi jumyskerlerdiń múddelerin qorǵaýdy qosa alǵanda áleýmettik jáne eńbek quqyqtaryna kepildik beredi.
Kelisim normalarynyń oryndalýyn baqylaý úshin Eńbek jáne halyqty áleýmettik qorǵaý mınıstrliginiń jáne Qatar memleketiniń Eńbek mınıstrliginiń ókilderinen Birlesken komıtet qurylatyn bolady.
Qatarlyq jumys berýshiler usynatyn barlyq bos oryndar migration.enbek.kz portalynda ornalastyrylatyn bolady, bul Qazaqstan azamattaryna Qatar memleketindegi eńbek múmkindikterine ashyq jáne resmı qoljetimdilikti qamtamasyz etedi.
Qazirgi ýaqytta EHÁQM Koreıa Respýblıkasymen, Saýd Arabııasymen, BAÁ, Slovakııa, Japonııa, Shvetsııa, Italııa, Norvegııa, Polsha, Chehııa, Rýmynııa jáne Fınlıandııamen eńbek qyzmetin retteý jáne eńbekshi-mıgranttardyń quqyqtaryn qorǵaý boıynsha osyǵan uqsas memorandýmdar men kelisimder jasasý boıynsha jumys júrgizýde.
2025 jylǵy 9 aıdyń qorytyndysy boıynsha shetelde eńbek qyzmetin júzege asyrý maqsatynda 156,7 myń qazaqstandyq jumys istep jatqanyn esterińizge sala ketken jón.
Qazaqstan azamattarynyń eń kóp sany Reseı Federatsııasynda (128,8 myń adam), Koreıa Respýblıkasynda (15,2 myń adam), Polshada (2,6 myń adam) jáne Ulybrıtanııada (1,4 myń adam) jumys isteıdi.
Aıta ketelik depýtat eńbek mıgranttaryna qosymsha salyq salýdy usynǵan edi.