Qazaqstan men Katar birlesken ınvestjobalardy pysyqtady
Vedomstvo aqparatyna sáıkes, Katar Ámiri sheıh Tamım bın Hamad Ál-Tanıdiń Qazaqstanǵa memlekettik sapary qarsańynda Prezıdent Qasym-Jomart Toqaevtyń tapsyrmasy boıynsha QR Syrtqy ister mınıstriniń orynbasary Almas Aıdarov bastaǵan qazaqstandyq delegatsııanyń Qatarǵa jumys sapary ótýde.
Sapardyń maqsaty – birlesken naqty ınvestıtsııalyq jobalardy pysyqtaý. Delegatsııa quramyna Indýstrııa jáne ınfraqurylymdyq damý mınıstrligi men Mádenıet jáne sport mınıstrliginiń basshylyqtary, sondaı-aq «Samuryq-Qazyna» UÁQ AQ, «KAZAKH INVEST» UK» AQ, «Astana» halyqaralyq qarjy ortalyǵynyń jáne Qazaqstannyń birqatar jeke kompanııalarynyń ókilderi kirdi.
«Moıyndaýymyz kerek, biz Qatardyń barlyq múmkindikteri men osy eldiń bizge degen dostyq qarym-qatynasyna qaramastan, álemdik ınvestor retindegi áleýetin tolyq kólemde paıdalanǵan joqpyz. Katar – jan basyna shaqqandaǵy JІÓ-niń úshinshi kórsetkishi bar, búkil álemde progressıvti kózqarasy bar jáne Qatar Investment Authority táýelsiz qor arqyly eń úzdik aktıvterde ınvestıtsııalyq qatysýy bar baı memleket. Biraq osynyń bári eskere otyryp, bizde is júzinde birlesken ınvestıtsııalyq jobalar joqtyǵyn belgilegim kelip tur. Bul bizdiń kemshiligimiz jáne biz Katardy qaıta ashýymyz kerek», - dedi Almas Aıdarov.
Sapar barysynda delegatsııa músheleri Katar Ortalyq bankiniń tóraǵasymen, sondaı-aq «Qatar Sports Investments», «Qatar Mining», «Qatari Diar», «Hassad Food», «Widam», «Katara Hospitality» ulttyq kompanııalarynyń, «Qatar Investment Authority» Egemen qorynyń birinshi basshylarymen, sondaı-aq Katar bıznesmender qaýymdastyǵymen, basqa da jeke ınvestorlarmen kelissózder júrgizdi.
Aldyńǵy ýaǵdalastyqtardyń jalǵasy retinde qazaqstandyq delegatsııa taý-ken metallýrgııa, agro- jáne qorǵanys ónerkásip keshenderi, týrızm, munaı-hımııa sııaqty salalarda jalpy baǵasy 4,6 mlrd dollardy quraıtyn 37 daıyn «brownfield» jobasyn usyndy. Bul jobalardyń qazaqstandyq senimdi seriktesteri bar jáne olar katarlyq ınvestıtsııalyq saıasattyń ereksheligin eskere otyryp iriktelgen.
Qazirdiń ózinde Almaty oblysynda mal sharýashylyǵy men sút óndirý, taý-ken metallýrgııa kesheni men qorǵanys ónerkásibi salalaryndaǵy jobalar boıynsha belsendi kelissózder bastaldy. Sondaı-aq, týrıstik ınfraqurylymdy keńeıtý sheńberinde ınvestorlar tarapynan Almaty jáne Mańǵystaý oblystarynda týrıstik obektilerdi salý múmkindigine suranys alyndy.
