Qazaqstan men Qatar arasynda saıası konsýltatsııalar ótti
ASTANA. QazAqparat Búgin Astanada Qazaqstan Respýblıkasynyń Syrtqy ister mınıstrligi men Qatar memleketiniń Syrtqy ister mınıstrligi arasynda ótken saıası konsýltatsııalardyń birinshi kezeńi barysynda eki el arasyndaǵy saıası, saýda-ekonomıkalyq jáne ınvestıtsııalyq, sondaı-aq mádenı-gýmanıtarlyq yntymaqtastyq máseleleri talqylandy.
Bul týraly syrtqy saıası vedomostvonyń baspasóz qyzmeti habarlady.
Qazaqstan delegatsııasyna syrtqy ister mınıstriniń orynbasary Aqylbek Kamaldınov, al Qatar delegatsııasyna Qatar Memleketi Syrtqy ister mınıstrliginiń bas hatshysy Ahmad ben Hasan ál-Hamadı basshylyq etti.
Taraptar ekijaqty jáne kópjaqty formattaǵy yntymaqtastyqty damytý jáne keńeıtý, qazirgi zamannyń ózekti máselelerin sheshý men ustanymdaryn úılestirýde halyqaralyq jáne óńirlik uıymdar sheńbrinde ózara árekettesý, sondaı-aq syrtqy saıası bastamalaryn ózara qoldaý múmkindikteri joldaryn aıqyndady. Osy turǵyda Qazaqstannyń BUU Qaýipsizdik Keńesindegi turaqty emes músheligin nazarǵa ala otyryp, BUU sheńberinde eki eldiń birlesken is-qımylynyń mańyzdylyǵy aıryqsha atap ótildi.
Qazaqstan ekonomıkasyna ınvestıtsııalar tartý maqsatynda birlesken jobalardy júzege asyrýdyń jáne Joǵary deńgeıdegi birlesken komıssııa qyzmetin jandandyrý arqyly saýda-ekonomıkalyq jáne ınvestıtsııalyq baǵyttardaǵy yntymaqtastyqty nyǵaıtýdyń mańyzdylyǵy aıtyldy.
Taraptar ekijaqty baılanystardy odan ári keńeıtýmen qatar, mádenıet, bilim jáne ǵylym salalaryndaǵy birlesken jobalardy júzege asyrýǵa ýaǵdalasty.
