Qazaqstan men Katar arasynda salyq salýdan jaltarýǵa jol berilmeıtin kelisim maquldandy - Májilis
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń Úkimeti men Katar Memleketiniń Úkimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly kelisimdi jáne oǵan Hattamany ratıfıkatsııalaý týraly» zań jobasy maquldandy. Atalǵan qujattarǵa 2014 jyldyń 19 qańtarynda Astana qalasynda qol qoıylǵan bolatyn.
Osy kelisim ýaǵdalasýshy memlekettiń nemese onyń ortalyq, ıakı jergilikti bılik organdary atynan alynatyn tabysqa salynatyn salyqtarǵa qatysty olardy alý ádisine qaramastan, ýaǵdalasýshy memleketterdiń bireýiniń nemese ekeýiniń de rezıdentteri bolyp sanalatyn tulǵalarǵa qoldanylady. Bul rette qujat jyljymaıtyn múlikten, kásipkerlikten túsetin paıda, teńiz nemese áýe kemeleriniń halyqaralyq tasymalynan alynǵan paıda, sondaı-aq pulǵa, birlesken kásiporynǵa nemese kólik quraldaryn paıdalaný jónindegi halyqaralyq uıymǵa qatysýdan alynǵan paıda boıynsha salyq salý tártibin retteıdi. Sonymen qatar ádebıet, óner týyndylaryna nemese ǵylymı jumystarǵa, kez kelgen patentke, saýda tańbasyna, dızaınǵa, qupııa formýlaǵa nemese protseske kez kelgen avtorlyq quqyqty paıdalanǵany nemese ónerkásiptik, kommertsııalyq nemese ǵylymı tájirıbege qatysty aqparat úshin kez kelgen syıaqy, sondaı-aq ónerkásiptik, kommertsııalyq nemese ǵylymı jabdyqty paıdalanǵany nemese paıdalaný quqyǵyn bergenge tólem úshin alynǵan paıdadaǵy salyq salýlar qarastyrylady.
«Kelisimniń maqsaty ınvestıtsııaǵa jaǵymdy ahýal qalyptastyrý arqyly Qazaqstan men Katar arasyndaǵy ekonomıkalyq yntymaqtastyqty nyǵaıtý jáne keńeıtý bolyp tabylady. Bul rette qujat aıasynda taraptardyń biriniń rezıdentteri bolyp tabylatyn zańdy jáne jeke tulǵalaryna qosarlanǵan salyq salýdy boldyrmaý sharalary qarastyrylady», - dedi Qarjy mınıstri Baqyt Sultanov.
Onyń aıtýynsha, Kelisim aıasynda taraptardyń quzyretti organdar arasyndaǵy aqparat almasýlary qamtylyp otyr.
Májilis maquldaǵan zań jobasy Parlament Senatyna joldanady.
