Qazaqstan men Katar arasynda avıareıster artady
Indýstrııa jáne ınfraqurylymdyq damý mınıstrliginen málim etkendeı, 26-27 shilde kúnderi Qazaqstan men Katardyń avıatsııalyq bıligi arasynda eki el tasymaldaýshylarynyń qatysýymen kelissózder ótti.
QR IIDM Azamattyq avıatsııa komıteti turaqty negizde ushý geografııasyn keńeıtý jáne turaqty halyqaralyq reıster sanyn ulǵaıtý boıynsha jumys júrgizýde.
Nátıjesinde reısterdi oryndaý boıynsha ózara túsinistik memorandýmyna qol qoıyldy:
- ár taraptan Astana jáne Doha qalalary arasynda aptasyna 7-den 14 reıske deıin;
- ár taraptan Almaty jáne Doha qalalary arasynda aptasyna 7-den 14 reıske deıin;
- «aýa erkindiginiń» 5 dárejesin qosa alǵanda, ár taraptan aptasyna 7-den 10-ǵa deıin júk reısi.
Osylaısha, ruqsat etilgen jıilikter sany aptasyna 21-den 38 reıske deıin artpaq.
Qol jetkizilgen ýaǵdalastyqtar negizinde «Qatar Airways» áýe kompanııasy bıylǵy jyl sońyna deıin «Almaty – Doha baǵyty» boıynsha oryndalatyn reıster sanyn kúnine 2 retke deıin (aptasyna 7-den 14 reıske deıin) ulǵaıtýdy josparlap otyr.
Sondaı-aq 2024 jyldyń ortasynda atalǵan avıakompanııa «Astana – Doha» baǵytyn ashýdy josparlap otyr.
Aıta keteıik, qazirgi ýaqytta Qazaqstanǵa «Qatar Airways»-tiń keń fıýzelıajdy «Boıng-787 Drımlaıner» úlgisindegi áýe kemeleri qatynaıdy. Kelissóz barysynda áýe kompanııasy Qazaqstan Respýblıkasyna atalǵan úlgidegi kemelerdi paıdalanýdy arttyratynyn habarlady.
Atap ótilgendeı, eki el arasynda reıster sanyn arttyrý týrızm, mádenıet, ınvestıtsııa jáne iskerlik yntymaqtastyq baǵyttaryn damytýdy jedeldetýge múmkindik beredi.
