Qazaqstan men Qatar arasyndaǵy strategııalyq seriktestikti nyǵaıtý máseleleri talqylandy
ASTANA. KAZINFORM - Qazaqstan Respýblıkasy Syrtqy ister mınıstriniń orynbasary Álibek Qýantyrov Dohaǵa sapary barysynda Qatar Syrtqy ister jónindegi memlekettik mınıstri Sultan Ál-Mýreıhımen kezdesti.
Kelissózder barysynda taraptar saýda-ekonomıkalyq jáne mádenı-gýmanıtarlyq baılanystardy nyǵaıtýdyń mańyzdylyǵyn atap ótip, joǵary deńgeıde saıası dıalogty odan ári nyǵaıtýǵa daıyn ekenin rastady.
Osy oraıda byltyr Doha jáne Astana qalalarynda eki memleket basshylary arasynda ótken kelissózderdiń qorytyndysy boıynsha qol jetkizilgen ýaǵdalastyqtardyń, onyń ishinde birlesken ınvestıtsııalyq jobalardy iske asyrýǵa baǵyttalǵan kelisimderdiń oryndalý barysy talqylandy.
Sapar aıasynda qazaqstandyq delegatsııa Qatar Saýda jáne ónerkásip mınıstriniń orynbasary Muhammed Hasan Álzaqskımen de kelissózder júrgizdi.
Olar eki el basshylarynyń nusqaýyna sáıkes ózara saýda aınalymyn arttyrý jáne ekonomıkalyq seriktestikti nyǵaıtý boıynsha ortaq is-qımyldy kúsheıtý baǵyttary jóninde pikir almasty.
Bıyl Astanada joǵary deńgeıdegi birlesken úkimetaralyq komıssııanyń kezekti otyrysyn ótkizý jáne Іskerlik keńestiń jumysyn jandandyrýdyń mańyzdyǵyna nazar aýdaryldy.
- Qatarlyq «UCC Holding» kompanııasynyń jobalar jónindegi atqarýshy dırektory Mehmed Ózozanmen ótken kezdesýde 2024 jylǵy 20 naýryzda eki el úkimetteri qol qoıǵan negizgi salalardaǵy jobalardy damytý úshin uzaq merzimdi strategııalyq seriktestik ornatý týraly kelisim aıasyndaǵy ınvestıtsııalyq jobalardyń júzege asyrý máseleleri talqylandy, - delingen SІM habarlamasynda.
Aıta ketelik Senatta Qazaqstan men Katar arasyndaǵy strategııalyq áriptestik týraly kelisim qaralǵan edi.