Qatar Qazaqstannan Tele2 baılanys operatoryn satyp alýy múmkin
ASTANA. KAZINFORM — Qasym-Jomart Toqaev Aqordada Power International Holding (PIH) kompanııasynyń basshylary Mýataz Ál-Haıat pen Ramez Ál-Haıatty qabyldady. Bul týraly Aqorda málim etti.
Áńgimelesý barysynda energetıka jáne telekommýnıkatsııa salalarynda birlesken ınvestıtsııalyq jobalardy júzege asyrý perspektıvasy qarastyryldy.
Prezıdenttiń aıtýynsha, gaz óńdeý, tasymaldaý jáne qýat óndirý salalary Qazaqstan men Qatar arasyndaǵy ınvestıtsııalyq yqpaldastyqtyń negizi sanalady. Bul baǵyttaǵy aýqymdy jobalar elimizdiń energetıkalyq qaýipsizdigine eleýli úles qosyp keledi.
— Memleket basshysyna PIH kompanııasynyń telekommýnıkatsııa naryǵyndaǵy qyzmetin keńeıtý jospary baıandaldy. Holdıng muny Mobile Telecom Service (Tele2) baılanys operatoryn satyp alý kelisimsharty aıasynda iske asyrmaq, — delingen habarlamada.
Qasym-Jomart Toqaev kompanııa osy arqyly telekommýnıkatsııa ınfraqurylymyn jańǵyrtýǵa, qyzmettiń sapasy men halyqqa qoljetimdiligin arttyrýǵa septigin tıgizetinine senim bildirdi.
Kezdesý sońynda Qazaqstan Prezıdenti men PIH kompanııasynyń basshylary ózara yqpaldastyqty odan ári jandandyryp, perspektıvti ınvestıtsııalyq jobalardy iske asyrýǵa beıil ekenin rastady.
Aıta keteıik, buǵan deıin Memleket basshysy Kýveıt Ámirine quttyqtaý jedelhatyn joldady.