Qazaqstan men Qatar arasynda jasyrynyp júrgen adamdardy ustap berý tártibi aıqyndaldy — Senat
ASTANA. KAZINFORM — Búgin Parlament Senatynyń jalpy otyrysynda «Qazaqstan Respýblıkasy men Qatar Memleketi arasyndaǵy ustap berý týraly kelisimdi ratıfıkatsııalaý týraly» zańy maquldandy.
Bul qujatqa 2024 jylǵy 14 aqpanda Doha qalasynda qol qoıyldy. Kelisimniń maqsaty — qylmys jasap, Qatar Memleketinde jasyrynyp júrgen azamattardy elimizge qaıtarý jáne sol eldiń azamattaryn ustap berý. Sondaı-aq, ekijaqty halyqaralyq quqyqtyq salada yntymaqtastyqty nyǵaıtýǵa erekshe nazar aýdarylyp otyr.
Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń málimetine qaraǵanda, kelisimde izdestiriletin adamdardy qylmystyq jaýapkershilikke tartý úshin olardy eki memleket arasynda ekstradıtsııalaý máseleleri reglamentteledi. Adamdardy ustap berý, ustap berýdi keıinge qaldyrý nemese ýaqytsha ustap berý sharttary men rásimderi aıqyndalǵan.
Kelisim kez kelgen jaǵdaıda izdeýdegi adamdy ustap berýden bas tartý qajet bolatyn jaǵdaıda mindetti negizderdi belgileıdi. Ýaǵdalasýshy memleketterdiń óz azamattaryn ustap berý kózdelmeıdi. Qujatty ratıfıkatsııalaý eki eldiń qylmysqa qarsy is-qımyl máseleleri boıynsha quqyqtyq yntymaqtastyǵynyń tıimdiligin arttyrady jáne ekijaqty qatynastardy nyǵaıtýǵa yqpal etetin bolady.
Budan buryn habarlanǵandaı, búgin Parlament Senatynda «Qazaqstan Respýblıkasy men Qatar Memleketi arasyndaǵy qylmystyq ister boıynsha ózara quqyqtyq kómek týraly kelisimdi ratıfıkatsııalaý týraly» zańy maquldandy.