Qazaqstan men Kaspıı óńiriniń energetıkalyq saıasatyn qurý mańyzdy – Energetıka vıtse-mınıstri

ASTANA. KAZINFORM - 2025 jylǵy 18 aqpanda Iran Islam Respýblıkasy Tegeran qalasynda 3-shi Kaspıı ekonomıkalyq forýmy aıasynda «Kaspıı mańy elderiniń energetıkalyq yntymaqtastyǵy» taqyryptyq sessııasy ótti.

Oǵan Qazaqstannan QR Energetıka vıtse-mınıstri Álibek Jamaýov qatysty.

Ol óz baıandamasynda «LÝKOIL» JAQ-men seriktestigimen júzege asyrylyp jatqan Kaspıı teńiziniń akvatorııasynda «Qalamqas-Hazar» jobasynyń iske asyrylý barysy týraly aıtty.

Sonymen qatar Qazaqstan Baký-Tbılısı-Djeıhan arqyly baǵyttardy damyta otyryp, munaı jetkizý baǵyttaryn belsendi túrde ártaraptandyrýda. Sondaı-aq, sessııada Álibek Jamaýov Kaspıı teńizi deńgeıiniń tómendeýine qatysty máselelerdi kóterip, Qazaqstan Respýblıkasy Energetıka mınıstrliginiń óńirdegi ekologııalyq táýekelderdiń aldyn alý jáne basqarý jónindegi bastamalaryna toqtaldy.

«Qazaqstan men Kaspıı óńiriniń barlyq elderi úshin úılestirilgen energetıkalyq saıasatty qurý óte mańyzdy. Bul bizge ózimizdiń tehnologııalyq quzyretterimizdi arttyrýǵa jáne áleýmettik-ekonomıkalyq damýda básekelestik artyqshylyqtarǵa ıe bolýǵa múmkindik beredi», - dep atap ótti QR Energetıka mınıstriniń orynbasary Álibek Jamaýov.

Sarapshylar Kaspıı mańy óńiri elderiniń energetıka salasyndaǵy birlesken kúsh-jigeri óńirdiń ekonomıkasy men ekologııasynyń turaqty damýy úshin senimdi negiz bola alatynyna senimdi.

Osyǵan deıin Energetıka mınıstri qańtarda munaı óndirý kóleminiń ulǵaıýyn túsindirgen bolatyn.