Qazaqstan men Kambodja saýda-ekonomıkalyq baılanystardy keńeıtedi
ASTANA. IKAZINFORM — Qazaqstan Respýblıkasynyń Premer-mınıstri Oljas Bektenov Astanaǵa alǵashqy resmı saparmen kelgen Kambodja Koroldiginiń Premer-mınıstri Hýn Manetpen kelissózder júrgizdi. Bul týraly Úkimet málim etti.
Úkimettik delegatsııalar saýda jáne ınvestıtsııalyq salalardaǵy yntymaqtastyqtyń áleýetin ashý sharalaryn talqylady.
Agroónerkásip jáne kólik-logıstıkalyq keshenderdegi, tsıfrlandyrý men jasandy ıntellekttegi, sondaı-aq týrıstik jáne gýmanıtarlyq baılanystardy damytý salasyndaǵy ózara is-qımyl máseleleri qaraldy.
— Taýar nomenklatýrasyn keńeıtý jáne isker toptar arasynda jańa tikeleı baılanystar ornatý baǵyttary aıtyldy. Kambodjanyń qarjy jáne iskerlik qoǵamdastyǵynyń ókilderi birlesken jobalardy júzege asyrý jáne óńirde ınvestıtsııalyq qatysýdy keńeıtý úshin AHQO múmkindikterin paıdalanýǵa shaqyryldy, — delingen habarlamada.
Agroónerkásip kesheninde Premer-mınıstr Oljas Bektenov Kambodja naryǵyna qazaqstandyq dándi daqyldardy, ósimdik maılaryn, et jáne aýyl sharýashylyǵy shıkizatyn qaıta óńdeý ónimderin jetkizýge qyzyǵýshylyq bildirdi. Aýyl sharýashylyǵy ónimderin óńdeý jáne saqtaý, zamanaýı ırrıgatsııalyq tehnologııalardy engizý jáne agrarlyq kooperatsııany damytý salasyndaǵy birlesken jobalardyń perspektıvalary qaraldy.
Kólik-logıstıka salasynda Transkaspıı halyqaralyq kólik baǵytyn Qytaı — Laos — Vetnam — Kambodja dálizimen ushtastyrý múmkindikteri talqylandy. Bul bastama Ońtústik — Shyǵys jáne Ortalyq Azııa arasyndaǵy kólik baılanystaryn keńeıtýge jáne eýropalyq naryqtarǵa júkterdi jetkizý úshin qosymsha jaǵdaı jasaýǵa múmkindik beredi.
Ekijaqty áriptestiktiń perspektıvaly baǵyttarynyń ishinde tsıfrlandyrý jáne jasandy ıntellekt, týrızm salalary da atalǵan.
Kezdesý qorytyndysy boıynsha Qazaqstan — Kambodja qatynastaryn odan ári damytýǵa, iskerlik baılanystardy keńeıtýge jáne saýda-ekonomıkalyq yntymaqtastyqtyń basym baǵyttary boıynsha birlesken bastamalardy praktıkalyq júzege asyrýǵa daıyndyq rastaldy.
Aıta keteıik, Kambodja Premer-mınıstri Qazaqstanǵa resmı saparmen keldi.
