Prezıdent: Kambodja – Qazaqstannyń Ońtústik-Shyǵys Azııadaǵy senimdi seriktesi

ASTANA. KAZINFORM — Prezıdent Qasym-Jomart Toqaev pen Kambodja Premer-mınıstri Hýn Manet Aqordada keńeıtilgen quramda kelissóz júrgizdi.

Qasym-Jomart Toqaev pen Hýn Manet keńeıtilgen quramda kelissóz júrgizdi
Foto: Aqorda

Memleket basshysy kelissóz aıasynda Kambodja Premer-mınıstri Hýn Manettiń Qazaqstanǵa alǵashqy sapary ekijaqty qarym-qatynasty jandandyrýǵa jol ashatynyn jáne ortaq nıetti naqty iske ulastyrýǵa múmkindik beretinin atap ótti.

– Bıyl eki el arasynda dıplomatııalyq baılanys ornaǵanyna 32 jyl tolyp otyr. Osy jyldar ishinde memleketterimiz syndarly saıası dıalog júrgizip, ózara tıimdi yntymaqtastyqty dáıekti túrde ilgeriletip keledi. Bizdiń aldaǵy qadamdarymyz búgin qabyldaıtyn Birlesken málimdemede kórinis tapqan. Sondaı-aq birqatar qujatqa qol qoıamyz. Qazaqstan Kambodjany Ońtústik-Shyǵys Azııadaǵy senimdi seriktesi jáne ASEAN uıymymen yqpaldastyqty keńeıtýdegi mańyzdy elderdiń biri retinde qarastyrady, – dedi Prezıdent.

Qasym-Jomart Toqaev kezdesýde Qazaqstan men Kambodjanyń halyqaralyq arenada, sonyń ishinde BUU janyndaǵy eki eldiń turaqty ókildikteriniń qyzmeti aıasynda belsendi qarym-qatynasty jolǵa qoıǵanyn atap ótti.

Prezıdent BUU Bas assambleıasynyń kún tártibindegi birqatar másele boıynsha Qazaqstannyń bastamalaryna Kambodjanyń qoldaý kórsetkenin joǵary baǵalady.

Aıta keteıik, búgin Aqordada Memleket basshysy Qasym-Jomart Toqaev Kambodja Koroldiginiń Premer-mınıstri Hýn Manetti qarsy aldy.

Prezıdent Qasym-Jomart Toqaev pen Kambodja Premer-mınıstri Hýn Manet shaǵyn quramda kelissóz júrgizdi.

Eske sala ketsek, bıyl shilde aıynda Shanhaıda ótken Dúnıejúzilik jasandy ıntellekt jónindegi konferentsııa aıasynda Memleket basshysy Kambodja Premer-mınıstri Hýn Manetpen kezdesken edi. Hýn Manet Kambodjanyń Qazaqstanmen qarym-qatynasty nyǵaıtýǵa múddeli ekenin rastady.