Qazaqstan men Kambodja saýda baılanysyn keńeıtýge nıetti
ASTANA. KAZINFORM — Qasym-Jomart Toqaev pen Hýn Manet keńeıtilgen quramda kelissóz júrgizdi. Bul týraly Aqordanyń baspasóz qyzmeti habarlady.
Memleket basshysy kelissóz aıasynda Kambodja Premer-mınıstri Hýn Manettiń Qazaqstanǵa alǵashqy sapary ekijaqty qarym-qatynasty jandandyrýǵa jol ashatynyn jáne ortaq nıetti naqty iske ulastyrýǵa múmkindik beretinin atap ótti.
– Bıyl eki el arasynda dıplomatııalyq baılanys ornaǵanyna 32 jyl tolyp otyr. Osy jyldar ishinde memleketterimiz syndarly saıası dıalog júrgizip, ózara tıimdi yntymaqtastyqty dáıekti túrde ilgeriletip keledi. Bizdiń aldaǵy qadamdarymyz búgin qabyldaıtyn Birlesken málimdemede kórinis tapqan. Sondaı-aq birqatar qujatqa qol qoıamyz. Qazaqstan Kambodjany Ońtústik-Shyǵys Azııadaǵy senimdi seriktesi jáne ASEAN uıymymen yqpaldastyqty keńeıtýdegi mańyzdy elderdiń biri retinde qarastyrady, – dedi Prezıdent.
Qasym-Jomart Toqaev kezdesýde Qazaqstan men Kambodjanyń halyqaralyq arenada, sonyń ishinde BUU janyndaǵy eki eldiń turaqty ókildikteriniń qyzmeti aıasynda belsendi qarym-qatynasty jolǵa qoıǵanyn atap ótti. Prezıdent BUU Bas assambleıasynyń kún tártibindegi birqatar másele boıynsha Qazaqstannyń bastamalaryna Kambodjanyń qoldaý kórsetkenin joǵary baǵalady.
Qasym-Jomart Toqaev Hýn Manettiń basshylyǵymen Kambodja áleýmettik-ekonomıkalyq tabystarǵa qol jetkizgenine toqtaldy.
Memleket basshysy Qazaqstan Kambodja Úkimetiniń Cambodia Vision 2050 jáne Pentagonal Strategy baǵdarlamalarynda mejelengen uzaqmerzimdi strategııalyq maqsattardy júzege asyrý baǵytyndaǵy kúsh-jigerin qoldaıtynyn aıtty. Prezıdent joǵary tehnologııalar salasyndaǵy yntymaqtastyqty nyǵaıtýǵa aıtarlyqtaı áleýet bar dep sanaıdy.
– Sizdiń jáne delegatsııańyzdyń elimizde jasandy ıntellektini damytý boıynsha qabyldanyp jatqan sharalarǵa qyzyǵýshylyq tanytyp otyrǵandaryńyzdy bilemin. Búgin Astanadaǵy Alem.ai halyqaralyq jasandy ıntellekt ortalyǵynda Qazaqstannyń osy salada qol jetkizgen tabystarymen jáne negizgi ázirlemelerimen tanysa alasyz. Elimiz BUU-nyń elektrondy úkimetti damytý ındeksine sáıkes, barlyq baǵytta oń dınamıka kórsetip keledi. Ortaq nıet pen berik saıası erik-jiger bolsa, ózara múddemizge saı keletin kóptegen baǵyt boıynsha yntymaqtastyq aıasyn keńeıte alatynymyzǵa senimdimin, – dedi Qasym-Jomart Toqaev.
Premer-mınıstr Hýn Manet eki el arasyndaǵy mádenı-gýmanıtarlyq baılanystardyń aıryqsha sıpatyna nazar aýdardy.
– Kambodjanyń 120-dan asa stýdenti Qazaqstanda bilim aldy. Búginde olardyń kóbi provıntsııalarda gýbernator, memlekettik hatshy laýazymdarynda eńbek etýde. Sonymen qatar memlekettik organdarda jaýapty qyzmetter atqaryp júr. Bul elderimizdi ortaq tarıh pen halyqtarymyz arasyndaǵy tyǵyz qarym-qatynas baılanystyratynyn ańǵartady, – dedi Premer-mınıstr.
Hýn Manet Kambodja azyq-túlik qaýipsizdigi, aýyl sharýashylyǵy jáne óńdeý ónerkásibi salalarynda yqpaldastyqty jandandyrýǵa nıetti ekenin aıtty. Taraptar joǵary deńgeıde júrgizilgen búgingi kelissózder elderimiz arasyndaǵy saýda-sattyq kólemin ulǵaıtyp, iskerlik barys-kelisti nyǵaıtýǵa jáne seriktestiń tyń baǵyttaryn jolǵa qoıýǵa yqpal etetinine senim bildirdi.
