Qazaqstan men Kambodja energetıka jáne elektrondy úkimet salasynda yntymaqtastyqty keńeıtpek
ASTANA. KAZINFORM – Qazaqstan men Kambodja energetıka salasyndaǵy baılanysty tereńdetip, elektrondy úkimet baǵytynda tájirıbe almasýǵa nıetti. Bul týraly Kambodja premer-mınıstri Hýn Manet Qazaqstan Prezıdenti Qasym-Jomart Toqaevpen kezdesýde aıtty.
Kambodja premer-mınıstri Qazaqstanǵa shaqyrǵany úshin Qasym-Jomart Toqaevqa alǵys aıtyp, eki el arasyndaǵy dıplomatııalyq baılanystar ornaǵanyna 30 jyldan asqanyn atap ótti.
– Búgin energetıka sektoryndaǵy yqpaldastyqty tereńdetý múmkindigi týyp otyr dep oılaımyn. Vedomstvolarymyzǵa ózara múddeli baǵyttardy anyqtaýdy tapsyra alamyz. Qazaqstan elektrondy úkimet boıynsha aıtarlyqtaı tabysqa qol jetkizdi ári ozyq ázirlemelerge ıe. Bizdiń mınıstrlikterimiz osy salada tájirıbe almasýǵa qyzyǵýshylyq tanytyp otyr, – dedi Hýn Manet.
Kezdesý barysynda taraptar saıası dıalogty, saýda-ekonomıkalyq baılanystar men kópjaqty alańdardaǵy yntymaqtastyqty odan ári keńeıtý jaıyn jan-jaqty talqylady.
Aıta keteıik, 2026 jylǵy qańtar-tamyz aılarynda Qazaqstan men Kambodja arasyndaǵy taýar aınalymy 29,4 mln dollar boldy. Bul ótken jylǵy osy kezeńimen salystyrǵanda 3,2%-ǵa kóp.
Qazaqstanǵa Kambodjadan kóbine toqyma jáne trıkotaj buıymdary, aıaq kıim men keıbir tutyný taýarlary jetkiziledi. Al Qazaqstan Kambodjaǵa negizinen baqylaý-ólsheý quraldaryn eksporttaıdy.
Búgin Aqordada Memleket basshysy Qasym-Jomart Toqaev Kambodja Koroldiginiń Premer-mınıstri Hýn Manetti qarsy aldy.
Prezıdent Qasym-Jomart Toqaev pen Kambodja Premer-mınıstri Hýn Manet shaǵyn quramda kelissóz júrgizdi.
Eske sala ketsek, bıyl shilde aıynda Shanhaıda ótken Dúnıejúzilik jasandy ıntellekt jónindegi konferentsııa aıasynda Memleket basshysy Kambodja Premer-mınıstri Hýn Manetpen kezdesken edi. Hýn Manet Kambodjanyń Qazaqstanmen qarym-qatynasty nyǵaıtýǵa múddeli ekenin rastady.
