Qazaqstan men Izraıldi munaıdan bólek dinaralyq dıalog baılanystyryp tur – Sımona Galperın
Izraıl Syrtqy ister mınıstrligi Eýrazııa jáne Balqan máseleleri jónindegi bas dırektorynyń orynbasary Sımona Galperın Astanadaǵy bırıfıngide Qazaqstan men Izraıl arasyndaǵy baılanystyń basym baǵyttaryn atady, dep habarlaıdy Kazinform.
«Munaı degen aradaǵy alys-beristiń bir ǵana komponenti. Baılanys aıasy odan da úlken. Tehnologııalar bar, rýhanı áriptestik te bar. Qazaqstan dinaralyq dıalog júrgizip keledi. Bizdiń ravvınder birneshe aı buryn ǵana Qazaqstanǵa kelip ketti. Bul áriptestik jalǵasyp keledi. Ári qaraı keńeıe túsedi dep úmittenemiz. Bizdiń osyndaǵy elshimiz sol úshin óte qarqyndy jumys istep jatyr», - dedi Sımona Galperın.
BAQ ókilderi odan eki eldiń qorǵanys salasyndaǵy áriptestigi men Izraıldiń shpıondyq tehnologııasy Qazaqstannyń joǵary laýazymdy tulǵalaryn ańdýǵa paıdalanylǵany týraly derekke baılanysty suraq qoıdy. Izraıl SІM ókili bul máseleler boıynsha jaýap berýge quzyretti emes ekenin aıtty.
Eske salsaq, Gaza sektoryndaǵy palestınalyq radıkaldar Izraıl aýmaǵyna zymyran atqylap, Izraıldiń ortalyǵy men ońtústiginde erekshe jaǵdaı engizilgen edi.
Sońǵy málimetter boıynsha, Izraıl áskeri Gazany tolyǵymen qorshap, ekige bólip tastaǵan. Syrtqy ister mınıstrliginiń málimeti boıynsha, Gaza sektorynda qazir Qazaqstannyń 76 azamaty bar.
«Bizdiń derekterimiz boıynsha Gaza sektorynda Qazaqstan Respýblıkasynyń 76 azamaty bar. Otbasy múshelerimen qosa eseptegende olardyń sany 161. Sonymen qatar sheteldik azamattardyń shyǵýyna baılanysty Mysyr jáne Izraıl tarapynan belgili talaptar bar. Olardyń úshten biri evakýatsııalaýǵa kelmeıdi. Olar kámeletke tolǵandar, erli-zaıyptylar», - dedi mınıstrliktiń resmı ókili Aıbek Smadııarov mınıstrlikte ótken baspasóz máslıhatynda.
