Qazaqstan men Izraıl vızasyz rejımge qatysty memorandýmǵa qol qoıdy
ASTANA. KAZINFORM – Qazaqstan Respýblıkasy Syrtqy ister mınıstri Ermek Kósherbaev pen Izraıl Memleketiniń Syrtqy ister mınıstri Gıdeon Saar Astanada ótken resmı kelissózder qorytyndysy boıynsha birqatar ekijaqty qujattarǵa qol qoıdy.
Taraptar ulttyq pasport ıelerin vızalyq talaptardan bosatý jónindegi yqtımal kelisimge qatysty nıet týraly memorandýmǵa, qoǵamdyq dıplomatııa salasyndaǵy yntymaqtastyq jónindegi ózara túsinistik týraly memorandýmǵa, sondaı-aq dıplomatııalyq kadrlardy daıarlaý baǵytyndaǵy ózara is-qımyldy kózdeıtin qujatqa qol qoıdy.
Kelissózder barysynda saýda-ekonomıkalyq, ınvestıtsııalyq, ınnovatsııalyq jáne gýmanıtarlyq baılanystardy keńeıtý máseleleri talqylandy.
QR Syrtqy ister mınıstri Ermek Kósherbaev Izraıl syrtqy saıası vedomstvosy basshysynyń Qazaqstanǵa sapary ekijaqty qarym-qatynastardy nyǵaıtýǵa degen ortaq umtylysty aıqyndaıtynyn aıtty.
– 2025 jyldyń qańtar–qarasha aılary aralyǵynda Qazaqstan men Izraıl arasyndaǵy taýar aınalymy 162 mln AQSh dollaryn quraǵan. Al sońǵy 20 jylda Izraılden Qazaqstan ekonomıkasyna shamamen 500 mln dollar kóleminde ınvestıtsııa tartylǵan, – dedi Ermek Kósherbaev.
Bul kezdesýde sý resýrstaryn tıimdi basqarý, aýyl sharýashylyǵy, azyq-túlik qaýipsizdigi salalaryndaǵy yntymaqtastyqqa erekshe nazar aýdaryldy. Qazaqstan tarapy Izraıldiń sý únemdeý tehnologııalary boıynsha jınaqtaǵan tájirıbesin joǵary baǵalap, ızraıldik kompanııalardy birlesken jobalarǵa shaqyrdy.
Sondaı-aq taraptar óńirlik jáne jahandyq kún tártibindegi ózekti máseleler boıynsha pikir almasty. Qazaqstan BUU Qaýipsizdik Keńesi bekitken «eki memleket – eki halyq úshin» qaǵıdatyna negizdelgen palestınalyq retteýdi qoldaıtynyn taǵy da rastady.
Óz kezeginde Izraıl Syrtqy ister mınıstri Gıdeon Saar Qazaqstandy Izraıldiń mańyzdy seriktesi ári dos eli retinde atap ótti.
– Qazaqstan – bizdiń senimdi áriptesimiz. Elderimiz arasyndaǵy qatynastar ortaq tarıh pen demokratııalyq qundylyqtarǵa negizdelgen. Biz Prezıdent Toqaevtyń bolashaqqa baǵyttalǵan kóregen saıasatyn joǵary baǵalaımyz jáne osy seriktestiktiń áleýetin tolyq iske asyrýǵa nıettimiz, – dedi Gıdeon Saar.
Izraıl tarapy ekonomıkalyq yntymaqtastyqty keńeıtýge, onyń ishinde kıberqaýipsizdik, densaýlyq saqtaý, aýyl sharýashylyǵy jáne sý resýrstaryn saqtaý salalaryna ınvestıtsııa salýǵa daıyn ekenin jetkizdi. Osy maqsatta Astanaǵa 30-dan astam bıznes ókilinen turatyn delegatsııa kelgen.
Aıta keteıik, Memleket basshysy 27 qańtar – Halyqaralyq Holokost qurbandaryn eske alý kúnine oraı Izraıl Prezıdenti Itshak Gertsogqa jedelhat joldaǵan edi.