Qazaqstan men Izraıl SІM basshylary telefon arqyly sóılesti
Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Izraıl memleketiniń Syrtqy ister mınıstri Elı Koenmen telefon arqyly sóılesti, dep habarlaıdy Kazinform.
Áńgime barysynda qos tarap saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ekijaqty qarym-qatynastardyń údemeli sıpatyn atap ótti.
Izraıl Syrtqy ister mınıstri Taıaý Shyǵystaǵy Izraıl men palestınalyq HAMAS qozǵalysy arasyndaǵy qaqtyǵys aıasyndaǵy qazirgi jaǵdaımen tanystyrdy.
M. Nurtileý qaqtyǵystyń shıelenisýine jáne áskerı is-qımyl aımaǵyndaǵy jaǵdaıdyń órshýine alańdaýshylyq bildirdi. QR SІM basshysy qazirgi qaqtyǵysqa qatysty Qazaqstannyń ustanymyn jetkizdi.
Qazaqstan mınıstri qaqtyǵysýshy taraptardy Taıaý Shyǵysta beıbitshilik pen turaqtylyqtyń joldaryn izdeýge shaqyrdy. Bul máseleniń búkil álem qaýymdastyǵy úshin jahandyq mańyzy bar ekenine nazar aýdardy.
Osy turǵyda qazaqstandyq dıplomat QR Prezıdenti Qasym-Jomart Toqaevtyń TMD Sammıtindegi málimdemesin atap ótip, jaǵdaıdyń shıelenisýi tek Taıaý Shyǵysta ǵana emes, jalpy álemde aýyr zardaptarǵa ákelýi múmkin ekenin basa aıtty. Osyǵan baılanysty Qazaqstan Izraıl-Palestına shıelenisin beıbit kelissózder men dıplomatııalyq dıalog arqyly sheshýge beıildi.
M. Nurtileý ızraıldik áriptesine Gaza sektoryndaǵy Qazaqstan azamattaryn evakýatsııalaýǵa járdemdesý týraly senimdi ótinish bildirip, bul mindettiń elimiz úshin birinshi kezektegi basymdyq ekenin atap ótti. Ol sondaı-aq E. Koendi qazaqstandyqtardyń Otanymyzǵa tezirek oralýy boıynsha Mysyr bıligimen júrgizilip jatqan jumys barysy týraly habardar etti.
Mınıstr E. Koen berilgen aqparat úshin áriptesine alǵys aıtyp, Izraıl tarapy Qazaqstan azamattaryn evakýatsııalaý máselesin sheshýge bar kúsh-jigerin salatynyna jáne bul máseleni óziniń jeke baqylaýǵa alatynyn jetkizdi.
