Qazaqstan men Izraıl Prezıdentteri keńeıtilgen quramda kelissóz júrgizdi
ASTANA. KAZINFORM — Qasym-Jomart Toqaev pen Itshak Gertsogtyń kelissózi eki el delegatsııasynyń qatysýymen keńeıtilgen quramda jalǵasty, dep habarlaıdy Aqordanyń baspasóz qyzmeti.
Memleket basshysy Qazaqstan men Izraıldiń san qyrly baılanystary uzaq ýaqyttan beri jalǵasyp kele jatqanyn atap ótti.
— Táýelsizdiktiń alǵashqy jyldarynan bastap elderimiz arasynda dostyq qarym-qatynas ornady. Izraıl Memleketi Qazaqstannyń egemendigin alǵashqylardyń biri bolyp moıyndady. 1993 jyly dıplomatııalyq ókildikterimizdi ashtyq. Sodan beri belsendi saıası dıalog qalyptasty. Saýda-ekonomıkalyq jáne ınvestıtsııalyq yqpaldastyqta eleýli jetistikterge qol jetkizdik, — dedi Qasym-Jomart Toqaev.
Prezıdenttiń pikirinshe, Ibrahım kelisimderi óńirlik turaqtylyqqa, saýda-ekonomıkalyq yntymaqtastyqty jandandyrýǵa berik negiz qalaıdy.
— Ózińizge málim, Qazaqstan buǵan deıin qabyldaǵan sheshimin ustanady. Ibrahım kelisimderine resmı túrde qosylý rásimin taıaý keleshekte Astanada uıymdastyrýǵa bolady dep esepteımiz. Sonymen qatar jasandy ıntellekt jáne tsıfrlandyrý salalaryndaǵy yntymaqtastyqty nyǵaıtýǵa múddelimiz. Bıyl Qazaqstanda Jasandy ıntellekt jáne tsıfrlandyrý jyly bolyp jarııalandy. Men bul máselege aıryqsha mán beremin, — dedi Memleket basshysy.
Budan buryn Memleket basshysy Qasym-Jomart Toqaev pen Izraıl Prezıdenti Itshak Gertsog shaǵyn quramda kelissóz júrgizgenin jazdyq.
