Qazaqstan men Izraıl ortaq qor qurýǵa kelisti
ASTANA. QazAqparat - Búgin vıtse-premer Asqar Myrzahmetov Izraıldiń aýyl sharýashylyǵy salasyndaǵy eń iri sanalatyn «LR GROUP» kompanııa basshylarymen kezdesti, dep habarlaıdy QR AShM baspasóz qyzmeti.
«LR GROUP» kompanııasynyń Izraıl memleketinde 100 jáne álem boıynsha 3000-ǵa jýyq qyzmetkerleri enshiles kompanııalar júıesi arqyly jumys isteıdi. Sonymen qatar, kompanııa kókónis, maı óndirý, taýyq jáne kúrketaýyq etteri men jumyrtqalaryn óndirý jáne jylyjaı keshenin damytýmen aınalysady.
Endi «LR GROUP» kompanııasy Qazaqstanda birlesken qor qurýǵa usynyspen kelip otyr. Bul qor qarjylyq uıym ǵana emes, jobalardy naqty júzege asyratyn, shetelden ınvestıtsııa tartatyn, jańa tehnologııalar endirip eksportpen aınalysatyn iri ortalyq bolmaq.
Kezdesý barysynda vıtse-premer jobanyń eki tarapqa da tıimdi ekenin atap ótip, «KazAgro» Ulttyq holdıngimen birlesip alǵashqy kezeńin bastaýǵa tapsyrma berdi. Endi eki jaqtaǵy jumysshy toby jobaǵa qajetti qarajatty eseptep, kelisimsharttar túzbek.
Aıta ketý kerek, A.Myrzahmetov ótken aptada ǵana Izraılge jumys saparymen baryp birneshe kelisimderge qol jetkizgen bolatyn. Sapar barysynda Izraıldiń 60-qa jýyq bıznes ókilderimen kezdesýler ótkizgen. Araǵa apta salmaı Izraıl tarapynan iri kompanııanyń kelip, ınvestıtsııa salýǵa nıet bildirýi eki jaqty kelisimniń naqty jemisi bolyp otyr.
