Qazaqstan men Izraıl erekshe balalardy oqytý boıynsha memorandýmǵa qol qoıdy
ASTANA. KAZINFORM — Qazaqstan men Izraıl erekshe bilim berýdi qajet etetin balalardy oqytý salasynda yntymaqtastyq týraly memorandýmǵa qol qoıdy. Bul týraly QR Oqý-aǵartý mınıstrligi habarlady.
Qujatqa QR Oqý-aǵartý mınıstrligi men Izraıl memleketiniń Aımaqtyq yntymaqtastyq mınıstrligi, Bilim mınıstrligi, Halyqaralyq yntymaqtastyqty damytý jónindegi agenttigi jáne Syrtqy ister mınıstrligi qol qoıdy.
Qujat ınklıýzıvti bilim berý salasyndaǵy yntymaqtastyqty damytý arqyly erekshe bilim berý qajettilikteri bar balalarǵa teń negizde sapaly bilim alý múmkindigin qamtamasyz etýge baǵyttalǵan. Munda bilim berý salasynda bilim men tájirıbe almasý, mamandardyń biliktiligin arttyrý, eki eldiń bilim berý uıymdary men sarapshylary arasyndaǵy kásibı baılanystardy nyǵaıtý máseleleri qamtylǵan.
— Bul Qazaqstan úshin ınklıýzıvti bilim berý salasyndaǵy praktıkalyq yntymaqtastyqty damytý men seriktestik baılanystardy tereńdetýdiń mańyzdy qadamy bolyp tabylady. Biz erekshe bilim berý qajettilikteri bar balalardy oqytý tájirıbesin jetildirýge jáne mamandardyń kásibı áleýetin arttyrý boıynsha áriptestikti nyǵaıtýǵa múddelimiz, — dedi Oqý-aǵartý mınıstri Juldyz Súleımenova.
Sońǵy jyldary Qazaqstanda ınklıýzıvti bilim berýdi damytýǵa erekshe kóńil bólinip keledi. Barlyq sanattaǵy balalar úshin teń qoljetimdilikti qamtamasyz etý maqsatynda qajetti normatıvtik baza qalyptastyryldy. Elde arnaıy bilim berý uıymdarynyń, psıhologııalyq-pedagogıkalyq qoldaý ortalyqtarynyń jáne resýrstyq kabınetterdiń sany artyp, barlyq mektepterde kedergisiz bilim berý standarttary engizilip jatyr.
Sondaı-aq bıyl qazan aıynda elimizde alǵash ret Búkiálemdik ınklıýzıvti bilim berý kongresi ótti. Bul mańyzdy is-shara saladaǵy jetekshi sarapshylar men pedagogıkalyq qaýymdastyq ókilderin bir alańda biriktirip, tájirıbe men ıdeıalar almasýǵa múmkindik berdi.
Aıta keteıik, buǵan deıin elimizde erekshe balalardy qoldaý úshin atqarylyp jatqan sharalar týraly jazǵan bolatynbyz.