Qazaqstan men Izraıl arasynda tikeleı áýe qatynasyn iske qosý máselesi talqylandy

NUR-SULTAN. QazAqparat - Qazaqstanda 11 áýejaıda «ashyq aspan» rejımi engizildi, 28 elmen 102 baǵyt boıynsha halyqaralyq áýe qatynasy qalpyna keltirildi. Sondaı-aq, Izraılmen tikeleı áýe qatynasyn ashý máselesi qarastyrylyp jatyr.

Bul týraly Mádenıet jáne sport mınıstri Dáýren Abaevtyń Izraıldiń týrızm mınıstri Ioel Razvozovpen kezdesýi barysynda belgili boldy, dep habarlaıdy QazAqparat atalmysh mınıstrliktiń baspasóz qyzmetine silteme jasap.

«Izraılmen tikeleı áýe qatynasyn ornatý Qazaqstannyń týrıstik jáne tranzıttik áleýetin damytýǵa, sondaı-aq mádenı ózara is-qımylǵa, saýda-ekonomıkalyq yntymaqtastyqqa yqpal etetin bolady. Qazir Izraıl azamattary úshin Qazaqstanǵa vızasyz kirý rejımi engizilgen. Bizdiń mınıstrlik ýákiletti organdarmen birlesip osy máseleni pysyqtaıdy», - dep atap ótti Dáýren Abaev.

Áńgime barysynda mınıstr Qazaqstanda týrızmdi damytýǵa baǵyttalǵan is-sharalarǵa jeke toqtaldy. Atap aıtqanda, 183 ınvestıtsııalyq jobadan turatyn baza quryldy, týrızm salasynda ınvestorlarǵa qolaıly jaǵdaı jasalyp jatyr, ınvestıtsııalyq shek tómendetildi, qosymsha qun salyǵynan bosatý túrinde ártúrli jeńildik beriledi jáne t. b.

Sondaı-aq taraptar ımıdjdik is-sharalar sheńberinde eki eldiń naryǵynda týrıstik ónimderdi ilgeriletý máselelerine erekshe nazar aýdardy.

Óz kezeginde Ioel Razvozov týrızm salasyndaǵy ózara qarym-qatynas áleýetin joǵary baǵalap, birlesken jobalardy iske asyrýǵa qyzyǵýshylyq tanytty. Onyń aıtýynsha, koronavırýs shekteýlerinen zardap shekken sala, ol-týrızm.

Foto: www.gov.kz