Qazaqstan men Italııanyń sottalǵandardy berý týraly sharty maquldandy - Májilis
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasy men Italııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldandy.
«Atalǵan kelisim Qazaqstan men Italııa arasyndaǵy sottalǵan tulǵalardy odan ári óz elinde jazasyn óteýi úshin ózara berý múmkinigin qarastyrady. Bul rette kelisim aıasynda sottalǵandardy berýdi júzege asyratyn naqty jaǵdaılar, sondaı-aq ondaı berýlerden bas tartatyn jaǵdaılar qarastyrylǵan», - dedi Bas prokýratýra orynbasary Iogan Merkel.
Onyń sózine qaraǵanda, kelisimge sáıkes, sottalǵan tulǵalardy ózara berý jaǵdaılary qarastyrylyp otyr. Atap aıtqanda, eger tulǵa úkimdi júzege asyratyn taraptyń azamaty bolyp tabylsa, berý týraly suraýdyń alynǵan ýaqyty men sottalǵan tulǵanyń jazasyn óteý ýaqyty bir jyldan artyq bolǵanda, sonymen qatar, sottalýshynyń nemese onyń zańdy ókiliniń jazbasha kelisimi bolǵanda ondaı tulǵalar berilýi múmkin.
Kerisinshe, eger taraptardyń biri ondaı tulǵalardy berý egemendikke, qaýipsizdikke, qoǵamdyq tártipke zalalyn tıgizedi dep sanasa, sondaı-aq olardy berý zańnamanyń irgeli qaǵıdattaryna qaıshy keletin bolsa, onda memleketter sottalǵandardy berýden bas tarta alady.
Májilis maquldaǵan zań jobasy Parlament Senatyna joldanady.
