Qazaqstan men Italııanyń Áskerı-teńiz kúshteri yntymaqtastyq máselelerin talqylady

NUR-SULTAN. QazAqparat - Qazaqstannyń jáne Italııanyń Áskerı-teńiz kúshteriniń ókilderi ekijaqty áskerı yntymaqtastyq máselelerin talqylady. Bul týraly QR Qorǵanys mınıstrliginiń baspasóz qyzmetinen málim etti, dep habarlaıdy QazAqparat.

«Áskerı yntymaqtastyq josparyna sáıkes, Nur-Sultan qalasyndaǵy Ulttyq áskerı-patrıottyq ortalyqta Qazaqstan Respýblıkasynyń jáne Italııa Respýblıkasynyń Áskerı-teńiz kúshteri ókilderiniń kezdesýi ótti. Onyń aıasynda taraptar 2019 jylǵa arnalǵan Áskerı yntymaqtastyq josparynda kórsetilgen Áskerı-teńiz kúshteriniń baǵyty boıynsha júrgiziletin aldaǵy is-sharalardy talqylady. Ásirese Qazaqstannyń Áskerı-teńiz kúshteriniń osy jyldyń ekinshi jarty jyldyǵynda Venetsııa qalasynda ótetin Áskerı-teńiz kúshteriniń XII sımpozıýmyna qatysý múmkindigi sóz boldy», - delingen baspasóz habarlamasynda.

Budan bólek qazaqstandyq áskerı teńizshilerdiń Italııanyń Áskerı-teńiz kúshteriniń sýasty mınasyzdandyrý salasyndaǵy sarapshylarymen kezdesýlerin uıymdastyrý máselesi qarastyryldy.

Kezdesý nátıjesi boıynsha Áskerı-teńiz kúshterin damytý salasyndaǵy yntymaqtastyqtyń perspektıvaly baǵyttary anyqtaldy.