Qazaqstan men Italııanyń AShM basshylary birlesken kásiporyndar qurý máselesin talqylady

ASTANA. QazAqparat - Rımde ótken kezdesýde QR Aýyl sharýashylyǵy mınıstri Erbol Qarashókeev pen AShM jáne Italııanyń azyq-túlik egemendiginiń basshysy Franchesko Lollobrıdjıda eki eldiń agrosektoryndaǵy qarym-qatynastardyń aǵymdaǵy jaı-kúıi men damý perspektıvalaryn talqylady, dep habarlaıdy QazAqparat QR AShM baspasóz qyzmetine silteme jasap.

2023 jyldyń 5 aıynyń qorytyndysy boıynsha Qazaqstan men Italııa arasyndaǵy aýyl sharýashylyǵy ónimderiniń taýar aınalymy 130 mln dollardy qurady. Eksport pen ımport kólemi byltyrǵy jyldyń sáıkes kezeńimen salystyrǵanda 51,5% ósimdi kórsetedi.
Erbol Qarashókeev Italııa Qazaqstannyń mańyzdy saıası jáne saýda-ekonomıkalyq seriktesi bolyp tabylatynyn atap ótti. Bizdiń elimiz ıtalııalyq baǵytqa bıdaı, meslın jáne kókónis ónimderin eksporttaıdy, óz kezeginde shokolad, sharap, kofe jáne túrli tuzdyqtardy ımporttaıdy.

Sondaı-aq mınıstr Qazaqstannyń AÓK elimizdiń azyq-túlik qaýipsizdigin ǵana emes, onyń áleýmettik-saıası turaqtylyǵyn qamtamasyz etetin ekonomıkanyń eń qarqyndy damyp kele jatqan sektorlarynyń biri ekenin atap ótti. Sonymen qatar, respýblıka egin óndirisinde hımııalyq zattardy qoldanýdyń eń tómengi deńgeıi boıynsha álemde birinshi orynda tur.

Qazaqstan agrarlyq sektorǵa ınvestıtsııa salý úshin keń múmkindikter usynady. AÓK-de, onyń ishinde sheteldik ınvestorlardyń qatysýymen ınvestıtsııalyq jobalardy iske asyrý úshin qarjylyq qoldaý sharalary, túrli salalyq jeńildikter men salyqtyq preferentsııalar kózdelgen.

Sonymen qatar, ınvestıtsııalardy tartýdyń mańyzdylyǵyn eskere otyryp, bıznesmender iri jobalardy iske asyrý úshin Qazaqstan Úkimetimen ınvestıtsııalar týraly tikeleı kelisim jasaı alady.

Erbol Qarashókeev yntymaqtastyq perspektıvalary týraly aıta kele, qazaqstandyq taraptyń aýyl sharýashylyǵy ónimderin qaıta óńdeý salasyndaǵy jobalardy damytýǵa qyzyǵýshylyǵyn atap ótti. Atap aıtqanda, astyqty tereń óńdeý jáne balalar taǵamyn óndirý týraly aıtyp ótti. AShM basshysy ıtalııalyq kompanııalardy qazaqstandyq-ıtalııalyq birlesken kásiporyndar qurýǵa shaqyrdy. Mınıstr sondaı-aq ıtalııalyq áriptesin Qazaqstanǵa kelýge shaqyrdy.

Franchesko Lollobrıdjıda óz kezeginde shaqyrýdy qabyldap, ınvestıtsııalyq baǵytta odan ári yntymaqtastyqqa jáne Qazaqstan aýmaǵynda aýqymdy jobalardy iske asyrý úshin ınvestorlardy izdeýge daıyn ekenin bildirdi.