Qazaqstan men Italııa jetkizý tizbegin nyǵaıtady
ASTANA. KAZINFORM – Astanada Qazaqstan Kólik mınıstrliginiń ókilderi Italy–Kazakhstan Supply Chain Forum 2026 halyqaralyq forýmy aıasynda ótken «Orta dálizdi damytý» taqyrybyndaǵy paneldik sessııaǵa qatysty.
Talqylaý barysynda memlekettik organdardyń, halyqaralyq uıymdardyń, sondaı-aq ıtalıandyq jáne halyqaralyq bıznes ókilderiniń qatysýymen Transkaspıı halyqaralyq kólik marshrýtyn (Middle Corridor) damytý máseleleri qaraldy.
Qazaqstannyń Eýropa men Azııa arasyndaǵy baılanysty qamtamasyz ete otyryp, Eýrazııadaǵy negizgi kólik-logıstıkalyq hab retindegi rólin júıeli túrde nyǵaıtyp kele jatqany atalyp ótti. Bul óz kezeginde tranzıttik jáne eksporttyq tasymaldaýdyń ósýine jaǵdaı jasaıdy.
Sonymen qatar Middle Corridor óziniń turaqtylyǵyn dáleldegeni aıtyldy. Qazirgi kezeńde negizgi nazar tasymaldardyń jyldamdyǵyn jáne ekonomıkalyq tartymdylyǵyn arttyrýǵa baǵyttalǵan.
Osyǵan baılanysty jumys dálizdiń barlyq elementin úılestirýge, atap aıtqanda ınfraqurylymdy damytýǵa, protsesterdi tsıfrlandyrýǵa jáne marshrýt boıyndaǵy «tar jerlerdi» joıýǵa baǵyttalǵan.
Italıandyq taraptyń yntymaqtastyqty keńeıtýge, onyń ishinde marshrýt boıyndaǵy ınfraqurylymdy damytý, logıstıkalyq qyzmetter jáne kólik kooperatsııasy jobalaryna qatysýǵa joǵary qyzyǵýshylyq tanytyp otyrǵany erekshe ataldy.
Qabyldanyp jatqan sharalar halyqaralyq seriktesterdiń qatysýy úshin qolaıly ınvestıtsııalyq orta qalyptastyrýǵa baǵyttalǵany aıtyldy. Qazaqstan kólik salasyna uzaq merzimdi ınvestıtsııalar úshin turaqty ári ashyq jaǵdaılardy qamtamasyz etedi.
Osyndaı keshendi tásil marshrýtty jaı tranzıttik baǵyttan jahandyq naryq úshin turaqty ári básekege qabiletti logıstıkalyq ónimge aınaldyrýǵa múmkindik beredi.
Aıta keteıik, Italııa mınıstri EO-ǵa janarmaı baǵasynyń ósýine qarsy sharalar qabyldaýdy usyndy.
