Qazaqstan men Italııa isker toptardyń baılanysyn nyǵaıtady

ASTANA. KAZINFORM — Qazaqstan men Italııa ózara saýda-sattyq kólemin odan ári arttyrýǵa kelisti. Bul týraly Aqordada Italııa Prezıdenti Serdjo Mattarellamen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty. 

— Qos memlekettiń túrli baǵyttaǵy yntymaqtastyǵy ýaqyt ótken saıyn arta túsýde. Saıası dıalogymyz joǵary deńgeıde júrip jatyr. Ekonomıka salasynda berik yqpaldastyq ornattyq. Byltyr eki el arasyndaǵy alys-beris kólemi 20 mlrd dollarǵa jetti. Bıylǵy 8 aıda bul kórsetkish 11,3 mlrd dollar boldy. Italııa — bizdiń eń iri ınvestıtsııalyq seriktesimizdiń biri. Qazaqstanda 250-ge ıtalııalyq kompanııa tabysty jumys istep jatyr. Bul el Qazaqstan ekonomıkasyna 2005 jyldan beri shamamen 7,6 mlrd dollardan astam qarjy quıdy. Osy baǵyttaǵy qarym-qatynasymyz oıdaǵydaı damyp keledi, — dedi Memleket basshysy.

Qasym-Jomart Toqaev jańa ǵana joǵary mártebeli Serdjo Mattarella myrzamen mazmundy kelissózder júrgizilgenin atap ótti.

— Meniń byltyr Rımge resmı saparmen barǵanymdy bilesizder. Sonyń aıasynda kóptegen ýaǵdalastyqqa qol jetkizgen edik. Búgin sol kelisimderdiń oryndalý barysyn talqyladyq. Sondaı-aq yqpaldastyǵymyzdy kúsheıtýdiń jańa baǵyttary týraly áńgimelestik. Ózara saýda-sattyq kólemin odan ári arttyrýǵa kelistik. Taýar túrin kóbeıtý úshin eń aldymen isker toptardyń baılanysyn odan ári nyǵaıtý qajet. Bul mańyzdy mindet, — dedi Prezıdent.

Aıta keteıik, Memleket basshysy Qasym-Jomart Toqaev Italııa Prezıdenti Serdjo Mattarellany birinshi dárejeli «Dostyq» ordenimen marapattady.