Qazaqstan men Italııa Prezıdentteri qarýly qaqtyǵystardyń ýshyǵýyna alańdaýshylyq bildirdi

ASTANA. KAZINFORM — Qazaqstan men Italııanyń halyqaralyq qurylymdar aıasyndaǵy yqpaldastyǵy nyǵaıyp keledi. Bul týraly Aqordada Italııa Prezıdenti Serdjo Mattarellamen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.

— Kelissóz kezinde bilim salasyna aıryqsha mán berdik. Qazirgi tańda Italııanyń úzdik joǵary oqý oryndarynda Qazaqstannyń 4 myńnan astam stýdenti bilim alyp jatyr. Sol úshin Italııa Úkimetine alǵys aıtamyn. Bıyl І.Jansúgirov atyndaǵy Jetisý ýnıversıtetiniń negizinde Marke polıtehnıkalyq ýnıversıtetiniń fılıaly jumys isteı bastady. Oqý orny jas urpaqtyń joǵary sapaly bilim alýyna múmkindik beredi dep senemiz, — dedi Prezıdent. 

Sonymen qatar Memleket basshysy kelissózder barysynda birqatar halyqaralyq másele boıynsha pikir almasylǵanyn aıtty. 

— Qazirgideı kúrdeli kezeńde qarýly qaqtyǵystardyń ýshyǵýyna alańdaýshylyq tanyttyq. Qos tarap barlyq tútkildi BUU jarǵysyna sáıkes beıbit jáne saıası dıplomatııa jolymen sheshý kerek dep sanaıdy. Qazaqstan men Italııa halyqaralyq yqpaldastyqty kúsheıtýge múddeli jahandyq turaqylyq pen beıbitishilikti nyǵaıtý isine belsene atsalysýǵa daıyn. Biz bir-birimizdiń bastamalarymyzdy únemi qoldap kelemiz. Kópjaqty dıplomatııany odan ary damytýǵa erekshe mán beremiz. Osy oraıda «Ortalyq Azııa-Italııa» dıalog alańy aımaqtyq deńgeıdegi áriptestigimizdi jandandyra túseri anyq. Italııa tarabynyń bastamasymen onyń alǵashqy otyrysy bıyl Astanada ótkenin bilesizder. Osylaısha, halyqaralyq qurylymdar aıasyndaǵy yqpaldastyǵymyz nyǵaıyp keledi, — dedi Qasym-Jomart Toqaev.

Aıta keteıik, Memleket basshysy Qasym-Jomart Toqaev Italııa Prezıdenti Serdjo Mattarellany birinshi dárejeli «Dostyq» ordenimen marapattady.