Qazaqstan men Italııa energetıka jáne ónerkásip salasynda kelisim jasaspaq
ASTANA. QazAqparat – Italııa Premer-Mınıstri Djordja Melonıdiń 30 mamyrda ótetin Qazaqstanǵa resmı sapary tanymal aqparat quraldarynyń nazaryn aýdarýda. Máselen, ıtalııalyq Agenzia Nova táýelsiz basylymy sapar kezinde energetıka jáne ónerkásip salasynda kelisimderge qol qoıý josparlanǵanyn jazdy. Buǵan qosa Premer-Mınıstrdiń Astanaǵa kelýine deıin Italy–Kazakhstan supply chain forýmynyń ótetini aıtylǵan. Osyǵan oraı Kazinform agenttigi atalǵan basylymda jarııalanǵan maqala mátinin usynady.
Eń aldymen bul jolǵy sapar Italııa men Ortalyq Azııadaǵy basty ekonomıka sanalatyn Qazaqstan arasyndaǵy energetıka jáne ónerkásip salasyndaǵy yntymaqtastyqty jańa deńgeıge kóterýdi maqsat etip otyr.
Astanada Melonı Qazaqstan Prezıdenti Qasym-Jomart Toqaevpen birge Maire kompanııasy men Qazaqstannyń ulttyq ál-aýqat qory – Samruk-Kazyna arasyndaǵy ınjenerlik jáne ónerkásiptik hab qurýǵa baǵyttalǵan yntymaqtastyq týraly kelisimge qol qoıý rásimine qatysady.
Sonymen qatar, Samruk-Kazyna qory Ansaldo Energia kompanııasymen birlesip, elektr stantsııalaryna arnalǵan gaz týrbınalarynyń bólshekterin Qazaqstanda óndirý boıynsha yntymaqtastyq týraly kelisimge qol qoıady.
Ótken jyldyń qańtar aıynda Prezıdent Toqaevtyń Rımge sapary kezinde Ansaldo kompanııasy Almatydaǵy JEO-3 nysanyn qaıta qalpyna keltirý aıasynda eki dana AE94.2 gaz týrbınasyn, eki generator jáne qosalqy qyzmetterdi jetkizýge, jańa nysandardy salýǵa qatysýǵa mindettelgen edi.
Melonı sapary barysynda qorshaǵan orta, mańyzdy shıkizattar, kadr daıarlaý jáne ǵylymı zertteýler salasyndaǵy yntymaqtastyqty qamtıtyn ózge de birqatar kelisimderge qol qoıylmaq.
Al Italııa Premer-Mınıstri Astanaǵa kelmeı turyp 28 mamyrda ótetin Italy–Kazakhstan supply chain forýmynda ne bolmaq? Bul is-sharaǵa eki eldiń ónerkásip, energetıka, aýyl sharýashylyǵy jáne logıstıka salalarynda jumys isteıtin 300-ge jýyq kompanııa men uıym ókilderi qatysady dep kútilýde.
Forýmda ekijaqty damýdyń qosymsha ınvestıtsııalyq múmkindikteri talqylanýy múmkin. Mundaı múmkindikterdiń biri – Transkaspıı halyqaralyq kólik baǵyty, ıaǵnı, Orta dáliz atalatyn joba. Bul Eýropany Qara teńiz, Kaspıı jáne Ortalyq Azııa arqyly Qıyr Shyǵyspen baılanystyratyn temirjol men teńiz baǵyttarynyń jelisi.
2030 jylǵa deıin Qazaqstan osy baǵyt aıasynda 4700 shaqyrymnan astam jańa jol, 1300 shaqyrymnan astam temirjol jelisin salýdy josparlap otyr. Bul jobalar Eýropalyq Odaqtyń Global Gateway strategııasyna da engen.
Qazir Qazaqstan men Italııa arasyndaǵy ekonomıkalyq qatynastar tarıhtaǵy eń joǵary deńgeıge jetti. 2024 jyly ekijaqty taýar aınalymy 20 mıllıard dollarǵa jýyqtap, ótken jylmen salystyrǵanda 24 paıyzǵa artty. Italııa osylaısha Qytaı men Reseıden keıingi Qazaqstannyń úshinshi iri saýda seriktesiniń qataryna endi.
2005 jyldan bastap 2024 jylǵa deıingi aralyqta ıtalııalyq kompanııalar Qazaqstan ekonomıkasyna 7,6 mlrd dollar kóleminde ınvestıtsııa saldy. Al Qazaqstanda turaqty jumys istep jatqan ıtalııalyq kompanııalar sany 170-ke jetken.