Qazaqstan men Italııa arasynda sottalǵan adamdardy berý týraly shart qabyldandy - Parlament
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasy men Italııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» QR Zańy qabyldandy. Parlament qabyldaǵan qujat endi memleket basshysynyń qol qoıýyna joldanady.
Atalǵan qujat bostandyqtan aıyrý túrindegi jazasyn odan ári óteýdi óz otanynda jalǵastyrý úshin sottalǵan adamdardy berý múmkindigine baılanysty máselelerdi retteıdi.
Osyǵan oraı, kelisim Qazaqstan men Italııa arasyndaǵy sottalǵan tulǵalardy odan ári óz elinde jazasyn óteýi úshin ózara berý múmkinigin qarastyrady. Bul rette kelisim aıasynda sottalǵandardy berýdi júzege asyratyn naqty jaǵdaılar, sondaı-aq ondaı berýlerden bas tartatyn jaǵdaılar qarastyrylǵan.
Atap aıtqanda, eger tulǵa úkimdi júzege asyratyn taraptyń azamaty bolyp tabylsa, berý týraly suraýdyń alynǵan ýaqyty men sottalǵan tulǵanyń jazasyn óteý ýaqyty bir jyldan artyq bolǵanda, sonymen qatar, sottalýshynyń nemese onyń zańdy ókiliniń jazbasha kelisimi bolǵanda ondaı tulǵalar berilýi múmkin. Kerisinshe, eger taraptardyń biri ondaı tulǵalardy berý egemendikke, qaýipsizdikke, qoǵamdyq tártipke zalalyn tıgizedi dep sanasa, sondaı-aq olardy berý zańnamanyń irgeli qaǵıdattaryna qaıshy keletin bolsa, onda memleketter sottalǵandardy berýden bas tarta alady.
Aıta keteıik, Qazaqstan mundaı halyqaralyq sharttardy Ázerbaıjan, Túrikmenstan, Ýkraına, Qytaı, Túrkııa, Ispanııa jáne Vengrııamen jasaǵan bolatyn.
