Qazaqstan men Italııa arasynda dıplomatııalyq qatynastyń ornaǵanyna 30 jyl toldy

NUR-SULTAN. QazAqparat - Atalǵan ýaqyt ishinde eki el arasyndaǵy qatynas teńdessiz joǵary deńgeıge jetti: mazmundy saıası dıalog júrip jatyr, ózara saýda qarqyny ósti, kelisimsharttar bazasy keńeıip, kópjaqty qurylymdar aıasyndaǵy yntymaqtastyq nyǵaıyp keledi. 2009 jyly qol qoıylǵan strategııalyq áriptestik týraly shart Qazaqstan-Italııa qarym-qatynasynyń erekshe mártebesin aıǵaqtaıtyn asa eleýli oqıǵa boldy, dep habarlaıdy QazAqparat.

Syrtqy saıası vedomstvonyń málimetinshe, búginde Qazaqstanda aýqymdy saıası ózgerister oryn alyp otyr.

Memleket basshysy saıası júıeni jańǵyrtýǵa, adam quqyqtaryn qorǵaý tetikterin jetildirýge, Jańa Qazaqstandy qurýǵa baǵyttalǵan reformalar baǵdarlamasyn usyndy.

Osy turǵyda Italııa Respýblıkasymen serpindi qarym-qatynastar elimizde júrgizilip jatqan reformalardy júzege asyrýǵa jáne ilgeriletýge mańyzdy úles qosty.

Italııa Respýblıkasy - elimizdiń asa iri saýda jáne ınvestıtsııalyq seriktesteriniń biri, al Qazaqstan Italııanyń Ortalyq Azııadaǵy mańyzdy seriktesi.

30 jyl ishinde Qazaqstan ekonomıkasyna quıylǵan ıtalııalyq ınvestıtsııanyń kólemi 15 mlrd AQSh dollaryna jetti.

2022 jyldyń birinshi jartysynyń qorytyndysy boıynsha Qazaqstan men Italııa arasyndaǵy taýar aınalymynyń jalpy kólemi 8 mlrd AQSh dollaryn qurady.

Saýda-ekonomıkalyq yntymaqtastyqtyń negizgi baǵyttary – energetıka, tabıǵı resýrstardy barlaý jáne óndirý, qurylys, ınfraqurylym, kólik, kommýnıkatsııalar, aýyl sharýashylyǵy, ǵylymı-tehnologııalyq sala.

Qazaqstanda Italııanyń 250-den astam kompanııasy sátti jumys istep tur.

Ekijaqty qatynasty damytý maqsatynda Ónerkásiptik jáne ekonomıkalyq yntymaqtastyq pen almasý jónindegi Úkimetaralyq jumys toby, sondaı-aq «Qazaqstan-Italııa» parlamenttik dostyq toby quryldy.

Halyqaralyq kún tártibindegi negizgi máseleler boıynsha ustanymdardyń uqsastyǵyn eskere otyryp, halyqaralyq uıymdar aıasynda elderimiz arasynda senimdi qatynas ornady.

Qazaqstan men Italııa álemdik arenada eki eldiń ózara qurmet qaǵıdasyna negizdelgen ózara is-qımyldy nyǵaıtýdy quptaıdy.

Óńiraralyq yntymaqtastyq ta qarqyndy damyp keledi.

Maýsym aıynan bastap Almaty jáne Mılan qalalary arasynda ıtalııalyq «NEOS» kompanııasy iske asyratyn áýe qatynasy ashyldy.

Mádenı-gýmanıtarlyq salada da bilim, kitaphana isi, ǵylymı-zertteý qyzmeti baǵyttary boıynsha ózara is-qımyl keńeıýde.

Abaıdyń 175 jyldyǵy aıasynda uly oıshyldyń «Qara sózderi» men poemalary ıtalıan tiline aýdaryldy.

Mılan qalasyndaǵy Ambrozıan kitaphanasynda jáne Venetsııa qalasyndaǵy «Ka Foskarı» ýnıversıtetinde qazaqstandyq mádenıet pen ádebıet ortalyqtary jumys isteıdi.

Qazaqstan men Italııany tek saıasat pen ekonomıka ǵana emes, sonymen birge Uly Jibek joly dáýirinen bastaý alatyn tarıh jáne ataqty venetsııalyq kópes Marko Polonyń Uly Dalanyń ulan-ǵaıyr keńistigine saıahaty jaqyndatady.

Qazaqstan Italııamen strategııalyq seriktestikti jan-jaqty nyǵaıtýǵa jáne damytýǵa baǵyttalǵan syrtqy saıası baǵytty odan ári júrgizýge nıetti.

Foto: gov.kz