Qazaqstan men Italııa arasyndaǵy saýda kólemi 16,9 mlrd dollarǵa jetti
ASTANA.KAZINFORM – Saýda jáne ıntegratsııa mınıstri Arman Shaqqalıev Qazaqstanǵa jumys saparymen kelgen Italııa Respýblıkasynyń Syrtqy ister jáne halyqaralyq yntymaqtastyq jónindegi Memlekettik hatshysynyń orynbasarymen kezdesti.
Kezdesýde taraptar ekijaqty saýda aınalymyn jaqsartýdy, shıkizattyq emes eksportty ulǵaıtý múmkindikterin jáne ónerkásiptik-tehnologııalyq yntymaqtastyqtyń perspektıvalaryn talqylady.
— Italııa — Qazaqstannyń Eýropadaǵy negizgi saýda-ekonomıkalyq seriktesteriniń biri. Sonymen qatar ózara saýda qurylymyn keńeıtýge aıtarlyqtaı múmkindik bar. Bizdiń baǵalaýymyz boıynsha, qazaqstandyq ónimderdi Italııa naryǵyna qosymsha jetkizý qarqyny shamamen 307,5 mln AQSh dollar. Bul rette metallýrgııa, munaı-hımııa, tamaq jáne hımııa ónerkásibi, sondaı-aq mashına jasaý ónimderine basymdyq beriledi, — dedi Arman Shaqqalıev.
2025 jyldyń qorytyndysy boıynsha Qazaqstan men Italııa arasyndaǵy ózara saýda kólemi 16,9 mlrd AQSh dollary. 2026 jyldyń qańtar–shilde aılarynda taýar aınalymy 9,79 mlrd dollarǵa jetti. Onyń ishinde Qazaqstannyń eksporty 9 mlrd dollardy, Italııadan ımport 789,6 mln dollar boldy.
Italııa tarapy saýda-ekonomıkalyq baılanystardyń turaqty óskenin atap ótip, Qazaqstanmen yntymaqtastyqty odan ári damytýǵa múddeli ekenin aıtty.
— Italııa men Qazaqstan arasyndaǵy qarym-qatynastardyń deńgeıin jáne ekijaqty saýdadaǵy oń dınamıkany joǵary baǵalaımyz. Italııa Qazaqstan ekonomıkasyn ártaraptandyrýǵa qoldaý kórsetý úshin óz tehnologııalary men tájirıbesimen bólisýge daıyn. Yntymaqtastyqtyń taǵy bir mańyzdy baǵyty — logıstıka. Bul salany odan ári jańǵyrtý úshin tájirıbe jáne tehnologııa almasýǵa daıynbyz, — dedi Marııa Trıpodı.
Erteń Astanada «Ortalyq Azııa + Italııa» bıznes-platformasynyń forýmy ótedi. Іs-shara barysynda saýda-ekonomıkalyq jáne ınvestıtsııalyq yntymaqtastyqtyń jańa baǵyttary, sondaı-aq Qazaqstan men Italııa kompanııalary arasyndaǵy iskerlik baılanystardy damytý talqylanady.
Aıta ketelik Qazaqstan Italııaǵa metall buıymdary eksportyn 6 ese arttyrǵan edi.
