Qazaqstan men Italııa arasynda 180 mıllıon eýroǵa memorandýmdar bekitildi
ASTANA. KAZINFORM — Elordada ótken «Italııa — Qazaqstan» iskerlik forýmynda eki eldiń uıymdary jalpy somasy 180 mıllıon eýro bolatyn 10 memorandýmǵa qol qoıdy.
Jobalar mashına jasaý, munaı hımııasy, aýyl sharýashylyǵyn qaıta óńdeý, metallýrgııa, logıstıkalyq protsesterdi tsıfrlandyrý tárizdi strategııalyq salalardy qamtıdy. Sondaı-aq Qazaqstan aýmaǵynda birlesken óndirister qurý arqyly Eýropa, Ortalyq Azııa jáne Qytaı naryǵyna shyǵý kózdelgen. Kezdesýge «Samuryq-Qazyna», «QazMunaıGaz», Eni, Maire Tecnimont, AnsaldoEnergia sekildi iri uıymdardyń ókilderi qatysyp jatyr.
Saýda jáne ıntegratsııa mınıstri Arman Shaqqalıev forým Qazaqstan men Italııa arasyndaǵy ekonomıkalyq qatynastardyń jańa kezeńiniń bastalýyn bildiretinin atap ótti.
− Búgingi forým saýda-ekonomıkalyq áriptestikti nyǵaıtýdyń negizgi alańyna jáne jahandyq ózgerister jaǵdaıyndaǵy strategııalyq dıalogqa umtylý sımvolyna aınaldy. Qazaqstan Italııa Respýblıkasymen jan-jaqty, pragmatıkalyq jáne uzaq merzimdi yntymaqtastyqty damytýǵa erekshe mán beredi. Biz tek saýdany keńeıtip qana qoımaı, jahandyq logıstıka qaıta qurylyp, protektsıonızm men álemdik ekonomıkanyń tsıfrlanýy kúsheıip jatqan kezde halyqaralyq jetkizý tizbekteriniń turaqtylyǵyn qamtamasyz etýge qabiletti ınnovatsııalyq ekojúıe qalyptastyryp jatyrmyz, — dedi mınıstr forýmnyń paneldi sessııasynda.
Forýmdy Saýda jáne ıntegratsııa mınıstrligi, Qazaqstan-Italııa saýda qaýymdastyǵy (ACIK) jáne eki el elshilikteri Astana International Forum aıasynda birlesip uıymdastyrǵan. Bul kezdesý ekijaqty yntymaqtastyqtyń perspektıvalaryn talqylaý, iskerlik baılanystardy nyǵaıtý jáne qosylǵan qun tizbegi boıynsha — logıstıka men ónerkásiptik kooperatsııadan bastap joǵary tehnologııalar men «jasyl» energetıkaǵa deıin birlesken jobalardy iske qosý alańyna aınaldy.
Buǵan deıin Premer-mınıstr Oljas Bektenov Qazaqstan men Italııa arasyndaǵy ekijaqty taýar aınalymy 20 mlrd dollarǵa jýyqtaǵanyn aıtqan edi.