Qazaqstan men Ispanııa SІM arasyndaǵy saıası konsýltatsııalardyń 8-shi raýndy Astanada ótedi
ASTANA. KAZINFORM – 2026 jylǵy 16 maýsymda Astanada Qazaqstan Respýblıkasy men Ispanııa Koroldiginiń Syrtqy ister mınıstrlikteri arasyndaǵy saıası konsýltatsııalardyń 8-shi raýndy ótedi. Bul týraly QR Syrtqy ister mınıstrliginiń resmı ókili Erlan Jetibaev málimdedi.
Onyń aıtýynsha, qazaqstandyq delegatsııany QR Syrtqy ister mınıstriniń orynbasary Arman Isetov, al Ispanııa delegatsııasyn Ispanııanyń memlekettik hatshysy Dıego Martınes Belıo basqarady.
– Konsýltatsııa barysynda taraptar saıası dıalogty damytý, saýda-ekonomıkalyq jáne ınvestıtsııalyq baılanystardy nyǵaıtý, mádenı-gýmanıtarlyq yntymaqtastyqty keńeıtý, sondaı-aq halyqaralyq jáne óńirlik kún tártibindegi ózekti máselelerdi qosa alǵanda qazaq-ıspan yntymaqtastyǵynyń keń aýqymdy baǵyttaryn talqylaýdy josparlap otyr, – dedi vedomstvo ókili brıfıngte.
Sondaı-aq Erlan Jetibaevtyń aıtýynsha, sol kúni Qazaqstan men Ispanııanyń memlekettik organdary, isker toptary, sarapshylyq qoǵamdastyǵy jáne akademııalyq ınstıtýttary arasyndaǵy baılanysty nyǵaıtýǵa arnalǵan jańa dıalog alańy – Qazaqstan–Ispanııa forýmynyń alǵashqy otyrysy ótedi.
– Forým perspektıvaly birlesken jobalardy ilgeriletýge jáne ózara is-qımyldyń basym baǵyttaryndaǵy praktıkalyq yntymaqtastyqty keńeıtýge yqpal etedi dep kútemiz. Aldaǵy is-sharalar Qazaqstan men Ispanııa arasyndaǵy strategııalyq áriptestikti odan ári damytýdyń mańyzdy kezeńi retinde qarastyrylyp, ekijaqty kópqyrly yntymaqtastyqty keńeıtýge qosymsha serpin berýge baǵyttalǵan, – dedi ol.
Mınıstrlik ókiliniń aıtýynsha, kezdesý barysynda qol jetkizilgen ýaǵdalastyqtardy iske asyrýǵa jáne aldaǵy ekijaqty is-sharalarǵa daıyndyq máselelerine de erekshe nazar aýdarylady.
Buǵan deıin Qazaqstan tehnıkalyq baıqaýdy tsıfrlandyrý úshin Ispanııa tájirıbesin engizetinin jazǵanbyz.
